“Парламентын боловсрол” хөтөлбөрийн аялалд 152 дугаар сургуулийн сурагчид хамрагдлаа

УИХ-ын Тамгын газраас зохион байгуулдаг “Парламентын боловсрол” хөтөлбөрийн “УИХ-ын үйл ажиллагаа, Төрийн ордон”-той танилцах аялалд Нийслэлийн ерөнхий боловсролын 152 дугаар сургуулийн 12Б ангийн сурагчид хамрагдав.

“Парламентын боловсрол” хөтөлбөр нь ардчилсан тогтолцоонд парламентын гүйцэтгэх үүрэг, хууль тогтоох байгууллагын үйл ажиллагааг хүүхэд, залуучууд, олон нийтэд цогц, системтэйгээр ойлгуулах, парламентын үйл ажиллагаа ил тод, төлөөллийг хангасан, үр нөлөөтэй байх ач холбогдлыг таниулах зорилготой юм.

Уг хөтөлбөрийг Швейцарын хөгжлийн агентлагийн “Монгол Улсад парламентын ардчиллыг бэхжүүлэх нь” дэд төслийн дэмжлэгтэй УИХ-ын Тамгын газраас 2021 оноос эхлэн хэрэгжүүлж байна. “УИХ-ын үйл ажиллагаа, Төрийн ордон” танилцах аяллыг 2022 оны аравдугаар сарын 25-ны өдрөөс зохион байгуулж буй.

Энэхүү танилцах аяллаар дамжуулан хүүхэд, өсвөр үеийнхэнд парламентат ёс, хууль тогтоох үйл явцын талаарх суурь мэдлэгийг олгохын зэрэгцээ хууль тогтоох үйл ажиллагаанд оролцох мэдлэг, чадвартай, идэвхтэй иргэдийг төлөвшүүлэхэд чиглэж байна.

Уг аялалд ерөнхий боловсролын сургуулийн 6 дугаар ангиас дээш буюу 12 наснаас дээш насны сурагчид хамрагддаг. Өнгөрсөн оны байдлаар давхардсан тоогоор 190 гаруй сургуулийн 6700 гаруй сурагч энэхүү хөтөлбөрт хамрагджээ.