"The MongolZ" баг албан ёсоор Б.Өнөдэлгэр буюу "controlez"-ийг багаасаа явуулж буйг зарлалаа

"The MongolZ" баг албан ёсоор Б.Өнөдэлгэр буюу "controlez"-ийг багаасаа явуулж буйг зарлалаа. Өдгөө 28 настай тэрбээр "Senzu"-г орлож, олон улсын гурван тэмцээнд оролцсон юм. Түүний хамтаар баг нь "IEM Chengdu" болон Будапешт Мэйжорын плей-офф шатанд шалгарч, өөрөө ч 1.05 гэсэн үзүүлэлттэй тун дажгүй тоглолтыг толилуулжээ.

"Controlez" анх 2017 онд "The MongolZ"-ийн бүрэлдэхүүнд тоглож байсан бөгөөд 2025 оны эхний Остин Мэйжорт "Chinggis Warriors" багийн хамтаар өрсөлдсөн түүхтэй.

Ингэснээр "The MongolZ" баг үндсэн бүрэлдэхүүндээ дахин дөрвөн тамирчинтай үлдлээ. Сэлгээнд суугаа "Senzu"-ийн ирээдүй тодорхойгүй байгаа. Түүний хувьд саяхан хийсэн стриймийнхээ үеэр "Удахгүй бүх зүйл тодорхой болно" гэж хэлсэн удаатай.

Эх сурвалжуудын мэдээлж буйгаар өдгөө "The Huns" багт тоглож буй У.Анарбилэг буюу "cobrazera"-г "The MongolZ" нэгтгэж байгаа гэв. Өдгөө 20 настай "cobrazera" нь өнөө цагийн Монголын шилдгүүдийн нэг гэдгээ харуулж, өнгөрсөн Будапешт Мэйжорт тоглосон билээ.