Монгол Улсын Хангайн бүс, Японы Шикокү бүсийн хамтын ажиллагааг эхлүүллээ

Гадаад харилцааны сайд Б.Батцэцэг Японы Шикокү бүсийн Токүшима мужийн Токүшима хотод өчигдөр зохион байгуулсан  “Монголын Хангайн болон Японы Шикокү бүсийн хамтын ажиллагааны ирээдүй” сэдэвт бүс хоорондын хамтарсан зөвлөгөөнд мэндчилгээ дэвшүүлэв.

Сайд Б.Батцэцэг Монголын Бүсчилсэн хөгжлийн бодлогын хэрэгжилтийг хангах хүрээнд хоёр улсын бүс, орон нутаг хоорондын харилцаа, хамтын ажиллагааг эрчимжүүлэхийн чухлыг онцлоод энэ чиглэлд гаргаж буй Япон дахь Өргөмжит консулуудын хүчин чармайлт, манлайлалыг өндрөөр үнэлсэн байна.

Шикокү бүсийн урилгаар Хангайн бүсийг төлөөлж Өвөрхангай аймгийн ИТХ-ын дарга Т.Нарангарав, Баянхонгор аймгийн Засаг даргын орлогч Б.Наранбаяр, Архангай аймгийн Засаг даргын орлогч Ч.Батнайрамдал, Япон дахь Монголын өргөмжит консулууд оролцжээ. Харин Японы талаас Шикокү бүсийн Японы Төлөөлөгчдийн танхимын гишүүдийн төлөөлөл, Токүшима, Коочи мужийн дэд захирагч, Токүшима мужийн Анан, Комацүшима, Ава хотуудын удирдлага, иргэдийн хурлын дарга, төлөөлөгчид, тус мужийн ХАҮТ-ын төлөөлөл, Баруун Японы Монгол солилцооны нийгэмлэгийн гишүүд болон хувийн хэвшлийн төлөөлөл оролцсон байна.  

Зөвлөгөөнөөр Хангайн бүсийн хөгжлийн зорилтын талаар дэлгэрэнгүй танилцуулж, цаашдын хамтын ажиллагааны талаар санал солилцсоноос гадна “Шинэ Хархорин хот” төслийн мэдээлэл өгчээ. Энэ удаагийн зөвлөгөөнийг Токүшима дахь Монгол Улсын Өргөмжит консул Ш.Каваүчитэй хамтран зохион байгуулсан нь консулуудын үйл ажиллагааг эрчимжүүлж, хамтын ажиллагааны бодлогын чиглэлийг тодорхойлох, харилцан туршлага солилцох зэргээр хоёр улсын харилцааг бүс, орон нутгийн түвшинд ойртуулж, харилцан ойлголцлыг бэхжүүлэхэд чухал ач холбогдолтой болов.