Цэргийн албан хаагчийг зодсон дүрмийн бус асуудалд хатуу хариуцлага тооцно гэв

Дотоод цэргийн 05 дугаар ангид хугацаат цэргийн алба хаагчид нэгнээ зодож буй бичлэг цахим орчинд өчигдөр буюу 2025.12.23-нд нийтлэгдэж олны анхаарлыг татсан. Улмаар цагдаа хүчний байгууллагаас хойшлуулшгүй шалгалтын ажиллагааг эхлүүлсэн. Сүүлийн жилүүдэд манай улсад цэргийн алба хааж байхдаа амь насаа алдсан цөөнгүй хэрэг бүртгэгдсэн. Тэгвэл ил бичлэг нь тухайн хэргүүдийн эхлэл цэргийн алба хаагчдын дунд дэг байдаг гэх асуудлыг тодотгоод буй. 

Өчигдөр цахим орчинд нийтлэгдсэн бичлэгийн талаар  Дотоод цэргийн штабаас мэдээлэл өглөө.

Дотоодын цэргийн штабын дарга, Бригадын генерал Р.Чингис: 

Бид олон аавын хүүхдүүдийг "Эр хүн, эх орны хүү болоосой" гэж хүсдэг учраас дүрмийн бус харьцааг хүлээн зөвшөөрдөггүй. Өчигдрийн хэрэг "Амрах" команд өгснөөс хойш нэг оны цэргүүдийн хувийн харьцаанаас болж гарсан гэх мэдээлэл авсан.  Цэргийн байгууллага хүн алдаг газар биш шүү дээ. Бидний үр хүүхдийг зодвол бид ч бас асуудал үүсгэнэ. Энэ хэрэг бидний хараа хяналтад байдаггүй "хар бүсэд" болсон асуудал. Дүрмийн бус харилцааг ямар ч цэргийн байгууллага хүлээн зөвшөөрдөггүй. Цэрэг зодсон асуудалд буруутай бүх хүмүүст хариуцлага тооцно гэв.

05 Дугаар Ангийн Захирагч Хурандаа Д.Манлайбаатар:  

"Их цочирдом зүйл боллоо.  Шаардлагатай арга хэмжээг авч ажиллаж байна. ЦЕГ, ХЭҮК-той хамтран ажиллаж байна. Тухайн цэргийг шүүх шинжилгээнд үзүүлсэн. Төрийн тусгай эмнэлэгт нарийн шинжилгээнд оруулж, эмчид мөн үзүүлсэн. Бусад алба хаагчдыг гэр бүлтэй нь холбоо тогтоолгож байна. Анги дотроо 24 цагийн 62 камертай. Нойл, шүршүүр зэрэгт байрлуулах боломжгүй. Үйл явдал камергүй өрөөнд болсон байна. Хэвлэл мэдээллийн байгууллагууд, иргэн энэ асуудлыг мэдээлсэнд үнэхээр баярлаж байна. 

Эцэг хүний хувьд, ангийн захирагчийн хувьд ч ийм зүйл байж болохгүй гэж үзэж байна.. Тухайн цэргүүд 2025 оны нэгдүгээр ээлжээр энэ жил татагдсан. Урьдчилсан байдлаар шүүх шинжилгээний үзлэгийн дүгнэлт хэвийн, нарийн мэргэжлийн эмчид үзүүлэх шаардлагагүй гэж гарсан.... гэх мэдээллийг өглөө.