​"ДУЛААН ШИЙДЭЛ II" төслийг үргэлжлүүлнэ

МБҮА ТББ-ын Ерөнхийлөгч Н.Баярсайхан, МБҮА ТББ-ын Гүйцэтгэх захирлын албан үүргийг Хавсран гүйцэтгэгч М.Энхбаатар нар 2025.12.12-ны өдөр Жэрэс ОУТББ-ын Суурин төлөөлөгч Завьер Рат болон тус байгууллагын "Дулаан шийдэл II" төслийн Дэд менежер Ц.Сүнжидмаа нарыг хүлээн авч уулзлаа.

Уулзалтаар талууд Европын холбооны СВИЧ-Эшиа хөтөлбөрийн санхүүжилттэй "Дулаан шийдэл II" төслийг үргэлжлүүлэн үр дүнтэй хамтран хэрэгжүүлэх болон цаашдын хамтын ажиллагааны талаар ярилцсан юм. Төслийн хүрээнд бусад хэрэгжүүлэгч байгууллагын хамтаар олон жил түншилж ирсэн туршлагадаа үндэслэн талууд хамтын ажиллагааны дараагийн шатанд гарах бүрэн боломжтой гэж үзэв.

МБҮА ТББ нь нийгмийн хариуцлагын хүрээнд 2018 оноос эхлэн "Дулаан шийдэл" төслийг хоёр үе шатанд хамтран хэрэгжүүлэгчээр ажиллаж байгаа бөгөөд цаашид дотоод, гадаадын хамтын ажиллагаагаа тэлэх алсын хараа, эрхэм зорилготой байна.

"Дулаан шийдэл II" төсөл нь Монголын нөхцөлд нийцсэн, үр ашигтай эрчим хүчний шийдлүүдийг боловсруулан нэвтрүүлж, хүлэмжийн хийн ялгарлыг бууруулахад хувь нэмрээ оруулж, эрүүл мэнд, эдийн засаг, нийгмийн хувьд үр ашигтай байх зах зээлийг бий болгох зорилгын хүрээнд дараах үр дүнтэйгээр хэрэгжиж байна. Үүнд:

-2,711 өрхөд дулаалгын "Хялбар шийдэл" аяныг хэрэгжүүлсэн.

-Дархан-Уул аймагт хүрээгээ тэлэв.

-Тэг рүү дөхсөн эрчим хүчний хэмнэлттэй сууц барилаа.

-168 барилгын салбарын бичил, жижиг, дунд бизнес эрхлэгчдийг чадавхжуулан сургав.

-Амины орон сууцны дулаалгын шийдлийн багц хэрэглэгдэхүүнийг хөгжүүлж байна.

-Төрийн болон хувийн хэвшлийн байгууллагуудтай хамтын ажиллагаагаа тэллээ.