Барилгын тусгай зөвшөөрлийн нөхцөл шаардлагыг танилцууллаа

МБҮА ТББ нь салбарын түншлэгч ТББ-уудтай хамтран ХББОСЯ-тай “Барилга байгууламжийн зураг төсөл боловсруулах, барилгын ажил гүйцэтгэх, өргөх байгууламж, түүний эд ангийн үйлдвэрлэл, угсралт, засвар үйлчилгээ эрхлэх хуулийн этгээдэд тусгай зөвшөөрөл олгох” үйл ажиллагааг 5 дахь удаа гэрээ байгуулан ажиллаж байгаа бөгөөд барилгын үйл ажиллагааны тусгай зөвшөөрлийн шинэ суурь нөхцөл, шаардлага болоод 2025.09.05-ны өдрөөс Зөвшөөрлийн нэгдсэн систем license.mn цахим системээр авдаг болсноор ААНБ, хуулийн этгээдүүдэд ямар өөрчлөлт бий болоод байгаа талаар МБҮА ТББ-ын Гүйцэтгэх захирал М.Энхбаатар танилцууллаа.

Мөн арга хэмжээний үеэр барилгын үйл ажиллагааны тусгай зөвшөөрлийн хүсэлтийг Зөвшөөрлийн нэгдсэн систем license.mn цахим системээр хэрхэн авах тохиргоо зааварчилгааг өгөхөөс гадна баруун бүсийн барилгын компаниудтай гэрээ хийх, зөвлөгөө мэдээллээр хангаж ажиллалаа.

Арга хэмжээний үеэр МБҮА ТББ-ын Ховд аймаг дахь салбар зөвлөл үйл ажиллагааны талаарх танилцуулгаа хийхээс гадна дахин төлөвлөлтийн хүрээнд орон нутагт өрнөж буй бүтээн байгуулалт, төсөл хөтөлбөрүүдийн хэрэгжилт, норм дүрмийн стандартыг хэрхэн ханган ажиллаж байгаа болоод барилгын үйл ажиллагааны үеэр хөдөлмөрийн аюулгүй байдлын зааварчилгааг мэргэжлийн сургагч багшийг авчран мэдлэг мэдээлэл өгсөнд Ховд аймгийн засаг даргын орлогч Л.Энхбаяр талархал илэрхийлэн ирэх онд хамтран ажиллахаар тогтлоо.