Нийслэлээс агаарын бохирдлыг бууруулах чиглэлээр хагас коксон түлшинд шилжүүлэх, гэр, байшинг дулаалж, хийн хэрэглээ, сэргээгдэх эрчим хүчийг нэвтрүүлэх зэрэг олон төрөлт арга хэмжээг зохион байгуулж ажиллаж байна. Үүний нэг сэргээгдэх эрчим хүчний төслийг Баруун салаа, Зүүн салааны айл өрхүүдэд ирэх онд хэрэгжүүлэхээр төлөвлөж байна. Энэхүү төслийг НЗДТГ, НҮБ-ын Хөгжлийн хөтөлбөр, нийслэлийн өмчит “Улаанбаатар хөрөнгө оруулалт, менежмент ҮЦК” ХХК-тай хамтран хэрэгжүүлэх юм. Тухайн байршилд өнөөдөр хотын дарга Х.Нямбаатар, НҮБ-ын Хөгжлийн хөтөлбөрийн суурин төлөөлөгч Матилда Димовска болон холбогдох албаныхан ажилласан байна.
Энэ үеэр хотын дарга Х.Нямбаатар “Агаарын чанар хэмждэг суурин болон явуулын станцуудын хэмжилтээр Баруун салаа, Зүүн салаа, Баянхошуунд агаарын бохирдол хамгийн ихтэй байршлаас бид мэдээллээ хүргэж байна. НЗДТГ, Улаанбаатар хөрөнгө оруулалт, менежмент компани, НҮБ-ын Хөгжлийн хөтөлбөртэй хамтарч Баруун салаа, Зүүн салааны айлуудыг сэргээгдэх эрчим хүч рүү шилжүүлэхээр бэлтгэж, төлөвлөгөө, ТЭЗҮ боловсруулах ажлыг зохион байгуулж байна. Ирэх зун нарны эрчим хүч нэвтрүүлж эхэлнэ. Түүнчлэн Баянхошуу хот орон сууцжуулах төслийн хүрээнд газар чөлөөлж, орон сууц барьж байгаа. Энэхүү төслийг Азийн хөгжлийн банк, Уур амьсгалын ногоон сангаас санхүүжүүлнэ. Тиймээс иргэд зөвхөн газар чөлөөлөлт дээр бидэнтэй хамтран ажиллахад дэмжлэг үзүүлэхийг хүсэж байна.
Нийслэлээс НҮБ-ын төрөлжсөн байгууллагуудтай хамтарч ажиллаж байгаа. Улаанбаатар хотод автомашины зогсоолуудыг цахилгаан машины цэнэглэгчтэй болгоход НҮБ-ын Хөгжлийн хөтөлбөртэй мөн хамтарч ажиллана. НҮБ-ын Хүүхдийн сангийн ЧИП төслөөр айл өрхүүдийг дулаалж байна. Айл өрхүүд гэр, байшингаа хангалттай дулаалсан байхад газ болон сэргээгдэх эрчим хүчний хэрэглээнд шилжихэд илүү дөхөм болно” гэдгийг онцоллоо.
НҮБ-ын Хөгжлийн хөтөлбөрийн суурин төлөөлөгч Матилда Димовска “Агаарын бохирдлыг бууруулах чиглэлээр олон төрлийн ажил хийж байгааг тань сонсоход таатай байна. Бидний хувьд сэргээгдэх эрчим хүчний төслүүдээр мэргэшсэн. Туршигдсан технологиор Улаанбаатар хотод нарны эрчим хүчний системийг хэрэгжүүлэх бүрэн боломжтой. Нийслэлийн байгууллагуудтай хамтраад ТЭЗҮ боловсруулж, ажлыг үргэлжлүүлнэ. Цахилгааны машин цэнэглэх авто зогсоол байгуулахад санал нэгдэж байна. Миний хувийн байр суурь ч гэсэн Улаанбаатар хотын дарга ард түмэнтэйгээ ингэж нээлттэй харилцаж байгааг эергээр хүлээж авч байна. Сэргээгдэх эрчим хүчний шийдэл Улаанбаатар хотод тохирч байгааг бид хэдийн туршсан. Энэ шийдэл бол туршигдсан, аюулгүй, тогтвортой систем. Бид та бүхэнтэй нягт хамтын ажиллагаатай ажиллана. Сэргээгдэх эрчим хүч хэрэглэснээр хүлэмжийн хийн ялгарлыг багасгаж байгаа нь өндөр үр дүн гэж харж байна” хэмээсэн юм.
Улаанбаатар хотын агаарын бохирдлын цөөнгүй хувийг автомашинаас ялгарах утаа эзэлдэг учраас цахилгаан автомашин хэрэглэхийг уриаллаа. Агаарын бохирдлын эх үүсвэрийг нэгдүгээр сард нарийвчлан судална. Ирэх оноос импортын нүүрс хэрэглэхгүй. Багануурын нүүрсний уурхайг түшиглэн дотоодын хагас коксын үйлдвэр барина. Дэлхийн хотуудын агаарын чанарыг хэмждэг IQAir төвийн мэдээллээр Улаанбаатар хот дэлхийн агаарын бохирдолтой хотуудын жагсаалтаас 20 байр урагшилсан. Эдгээр төсөл хэрэгжсэнээр Улаанбаатар хот агаарын бохирдолтой 100 хотын жагсаалтаас гарах бүрэн боломжтой аж.
Улаанбаатар °C 
Сэтгэгдэл (0)
Сэтгэгдэл бичигдээгүй байна