ТАНИЛЦ: Орон орон дамжсан элчин сайдууд...

Орон орон дамжиж элчингээс элчин дамжсан эрхмүүд элчин сайдаар дахин томилогдож буй. Сүүлийн 20 жилд гадаад улсад суугаа элчин сайдын яамдуудад элчин зөвлөх болон бусад албан тушаал хашиж байсан хүмүүс дахин элчин сайдаар бусад улс орнуудад томилогдоод буй юм. Монгол Улсын иргэн хэдий ч гадаад улсад амьдралынхаа ихэнхи цаг хугацааг өнгөрөөж буй тэд иргэдийнхээ эрх ашгийг хамгаалж ажиллаж чадах эсэх нь эргэлзээтэй. Хөрсөн дээрх амьдралыг мэдэхгүй ийш тийшээ томилогдож буй жагсаалтыг бид онцолж байна.  

• Монгол Улсаас Тайландын Хаант Улсад суух Онц бөгөөд Бүрэн эрхт Элчин сайдаар Вашагийн Оюу томилогдоод буй. Тэрбээр, 2006-2009 онд Монгол Улсаас Тайландын Хаант Улсад суугаа Элчин сайдын яаманд гурав, хоёрдугаар нарийн бичгийн дарга, Ази Номхон далайн эдийн засаг, нийгмийн комисст суугаа Байнгын төлөөлөгчийн орлогч, 2013-2017 онд Монгол Улсаас Нэгдсэн Үндэсний Байгууллагын Женев дэх төв болон олон улсын бусад байгууллагын дэргэд суугаа Байнгын төлөөлөгчийн газарт зөвлөх, Элчин зөвлөх, 2021-2025 онд Монгол Улсаас Канад Улсад суугаа Элчин сайдын яаманд Элчин зөвлөхөөр ажиллаж байсан юм. Сүүлийн 20 жилд Элчин сайдын яаманд ажилласаар ирсэн бөгөөд үргэлжлүүлэн 4 жил буюу тэтгэвэрт гарах хүртлээ элчингээр сууна гэсэн үг.
• Монгол Улсаас Бүгд Найрамдах Чех Улсад суух Онц бөгөөд Бүрэн эрхт Элчин сайдаар томилогдох гэж буй Батсайханы Болормаа. Тэрбээр, 2012 оноос хойш 13 жилийн турш элчин сайдын яаманд ажиллаж байгаад одоо Чех улсад суух Онц бөгөөд Бүрэн эрхт Элчин сайдаар томилогдож буй. 2012-2016 онд Монгол Улсаас Америкийн Нэгдсэн Улсад суугаа Элчин сайдын яаманд зөвлөх, 2016-2017 онд Бодлого, төлөвлөлтийн газарт зөвлөх, 2017-2022 онд Европын газрын дэд захирал, 2022 оноос хойш Монгол Улсаас Их Британи, Умард Ирландын Нэгдсэн Хаант Улсад суугаа Элчин сайдын яаманд Элчин зөвлөхөөр ажиллаж байгаа юм. Тэрээр мөн л тэтгэвэрт гартлаа Монгол Улсаас Бүгд Найрамдах Чех Улсад суух Онц бөгөөд Бүрэн эрхт Элчин сайдаар ажиллахаар байна.
• Монгол Улсаас Холбооны Бүгд Найрамдах Герман Улсад суух Онц бөгөөд Бүрэн эрхт Элчин сайдаар Жагдагийн Оюунбаатар жагсаалтыг үргэлжлүүлж байна. Тэрбээр, 2021-2025 онд Монгол улсаас Бүгд найрамдах Солонгос улсад суугаа Элчин сайдын яаманд элчин зөвлөхөөр ажиллаж байсан юм. Ийнхүү үргэлжлүүлэн Герман улсад элчин сайдаар ажиллахаар болж байна.