​ 367 нэр төрлийн бараа бүтээгдэхүүн татваргүй экспортлох боллоо

Засгийн газраас энэ оны 11 дүгээр сард УИХ-д өргөн мэдүүлсэн Монгол Улс болон Евразийн эдийн засгийн холбоо, түүний гишүүн орнууд хоорондын худалдааны түр хэлэлцээрийг баталлаа. Ингэснээр харилцан экспорт, импорт хийдэг 367 бараа бүтээгдэхүүнийг татваргүй экспортлох боломж бүрдлээ. 

Евразийн эдийн засгийн холбооны орнуудаас 367 нэр төрлийн Монгол Улсад үйлдвэрлэдэггүй хүнсний бүтээгдэхүүн болон хүнд машин, механизм, тоног төхөөрөмж, химийн бордоо, азотын бордоо импортоор авна. Үр дүнд нь уул уурхайн бус экспорт, ажлын байр, эдийн засгийн идэвхжил нэмэгдэхээр байна. Энэхүү хэлэлцээр нь хөрөнгө оруулалт, үйлчилгээний худалдаа, банк санхүү, төлбөр тооцоо зэрэг асуудлыг тусгаагүй, зөвхөн 367 барааны хүрээнд тохиролцжээ. Гаалийн байгууллагуудын хамтын ажиллагаа эрчимжиж, шуурхай байдлыг ханган, гадаад худалдаанд гарсан хүндрэл бэрхшээлийг шийдэх, зардлыг бууруулах зэрэг давуу тал энэ хэлэлцээр хэрэгжсэнээр гарах юм. Евразийн эдийн засгийн холбооны худалдааны  түр хэлэлцээрийг соёрхон баталснаар дөрвөн цагийн дотор гаалийн бүрдүүлэлтийг олгож, 5000 евро хүртэлх бараа бүтээгдэхүүн дээр тухайн экспортлогч гарал үүслийн гэрчилгээ бүрдүүлэх боломжтой болсон нь  Монголын аж ахуйн нэгжүүдэд эерэг нөлөө үзүүлнэ. Монгол Улс болон Евразийн эдийн засгийн холбоотой байгуулсан худалдааны түр хэлэлцээр гурван жилийн хугацаатай бөгөөд талууд өөрөөр тохиролцоогүй бол хугацааг сунгасанд тооцох юм байна. Монгол Улс 2024 онд 162 оронтой худалдаа хийж, гадаад худалдааны бараа эргэлт 27.4 тэрбум ам.долларт хүрчээ. Экспорт 15.8 тэрбум ам.доллар, импорт 11.6 тэрбум ам.доллар болж, худалдааны тэнцэл 4.2 тэрбум ам.долларын ашигтай гараад байна.