”Хууль ба жендэр” эрдэм шинжилгээний хурал зохион боллоо

Жендэрийн үндэсний хороо, МУИС-ийн Хууль зүйн сургууль, МУИС-ийн Хууль зүйн сургуулийн Харьцуулсан эрх зүй, олон улсын эрх зүйн судалгааны хүрээлэнтэй хамтран “ХУУЛЬ БА ЖЕНДЭР” сэдэвт эрдэм шинжилгээний хурлыг Монгол Улсад жeндэрийн тэгш байдлыг хангах үндэсний тогтолцоо үүсч хөгжсөний 30 жилийн ойг тохиолдуулан өнөөдөр /2025.12.09/ зохион байгууллаа.

Энэхүү эрдэм шинжилгээний хурал нь жендэрийн эрх тэгш байдалтай холбоотой эрх зүйн боловсролын салбарын үйл ажиллагааны хүрээнд тулгамдаж буй асуудал, мөн хууль зүйн мэргэжлийн үйл ажиллагаа болон хууль хэрэглээнд тулгамдаж буй асуудлууд, тэдгээрийг шийдвэрлэх арга зам, орчин үеийн чиг хандлагын талаар багш, эрдэмтэн, судлаач нарын санаа бодол, арга туршлага, судалгааны үр дүнг хэлэлцэх зорилготой.

”ХУУЛЬ БА ЖЕНДЭР” сэдэвт эрдэм шинжилгээний хурлын нээлтэд Улсын Их Хурлын гишүүн Б.Уянга, Жендэрийн үндэсний хорооны Нарийн бичгийн дарга бөгөөд Ажлын албаны дарга А.Адилбиш, МУИС-ийн Хууль зүйн сургуулийн Нийтийн эрх зүйн тэнхимийн дэд профессор, доктор Д.Батболд нар оролцлоо.

Эрдэм шинжилгээний хурлын зочин шүүгчээр Монгол Улсын гавъяат хуульч, Жендэрийн үндэсний шинжээч Б.Долгор, МУИС-ийн Хууль зүйн сургуулийн Нийтийн эрх зүйн тэнхимийн дэд профессор, доктор Д.Батболд нар ажилласан бөгөөд ЭШХ нь “Эрх зүйч бэлтгэх хөтөлбөр”-ийн агуулгад жендэрийн эрх тэгш байдлын үзэл баримтлал тусгах сургалтын удирдамж гарсантай холбогдуулан МУИС Хууль зүйн сургууль болон Жендэрийн үндэсний хорооноос зохион явуулж байгаагаараа онцлог юм.

Эрдэм шинжилгээний хурлын нэгдүгээр хэсгийг МУИС-ийн Хууль зүйн сургуулийн Нийтийн эрх зүйн тэнхимийн ахлах багш О.Чулуунцэцэг чиглүүлсэн бөгөөд эрдэмтэн, судлаачид хууль зүйн салбар дахь жендэрийн асуудал болон хууль хэрэглээ, хууль зүйн техник дэх жендэр, эрх зүйч бэлтгэдэг их дээд сургуулиудын хичээлийн агуулга дахь болон боловсон хүчний жендэрийн асуудал мөн түүнчлэн холбогдох бусад сэдвээр илтгэл хэлэлцүүллээ.

Тухайлбал, СИТИ Их Сургуулийн Хууль зүйн сургуулийн захирал, доктор, дэд профессор Б.Одонгэрэл “Жендэрт суурилсан хүчирхийллийн асуудал”, МУИС-ийн Хууль зүйн сургуулийн Нийтийн эрх зүйн тэнхимийн ахлах багш О.Чулуунцэцэг “Хохирогчид үзүүлэх сэтгэл зүйн хүч,ирхийллийн хэлбэр”, ЖҮХАА-ны Жендэрийн дүн шинжилгээ, мэдээлэл судалгааны хэлтсийн дарга О.Буянаа “Ажлын байрны бэлгийн дарамтын эрх зүйн зохицуулалт, хууль ба практик”, МУИС, Хууль Зүйн Сургуулийн Хувийн эрх зүйн тэнхимийн ахлах багш, доктор М.Мөнхнаран “Монголын Хуульчдын Холбооны Ерөнхийлөгчийн Сонгуульд нэр дэвшсэн эмэгтэй хуульчдын судалгаа” зэрэг сэдвээр илтгэл хэлэлцүүлж шүүгчид болон оролцогчдын асуултад хариулсан юм.

Эрдэм шинжилгээний хурлын хоёрдугаар хэсгийг СИТИ Их Сургуулийн Хууль зүйн сургуулийн захирал, доктор, дэд профессор Б.Одонгэрэл чиглүүлж, Жендэр судлалын магистр, Судлаач Б.Батчимэг “Эмэгтэй улс төрчдийн төлөөллийг нэмэгдүүлэхэд сонгуулийн тогтолцооны үзүүлэх нөлөө”, Батлан Хамгаалах Яамны Батлан хамгаалахын эрдэм шинжилгээний хүрээлэнгийн ахлах ажилтан, доктор, профессор Б.Баатарсүрэн, ахлах ажилтан, хошууч Ч.Сэрээнэн “Эмэгтэй цэргийн албан хаагчийн эрх зүйн байдлын харьцуулсан шинжилгээ”, Мандах Их Сургуулийн Инженер Эдийн Засгийн Сургуулийн ахлах багш М.Ганхөлөг, Н.Далайсайхан, ахлах багш, доктор, Б.Сайнжаргал “ “Z” үеийн сонгогчдын шийдвэр гаргалтад жендэрийн нөлөө” зэрэг сэдвээр илтгэл хэлэлцүүллээ.