Гадаад харилцааны сайд Б.Батцэцэг Вена дахь олон улсын байгууллагуудад ажиллаж буй Монгол иргэдтэй уулзав

Монгол Улсын Их Хурлын гишүүн, Гадаад харилцааны сайд Б.Батцэцэг Австри Улсад хийж буй айлчлалынхаа хүрээнд Вена дахь Нэгдсэн Үндэстний Байгууллагын байранд зочилж, тус салбар төвийн дэргэдэх олон улсын байгууллагуудад ажиллаж буй Монгол иргэдтэй уулзаж, санал солилцлоо.

Уулзалтын үеэр сайд Б.Батцэцэг Монгол Улсын нийгэм, эдийн засгийн өнөөгийн нөхцөл байдал, хөгжлийн зорилтуудын талаар танилцуулж, гадаадад ажиллаж буй монгол мэргэжилтнүүдийн мэдлэг, туршлага, олон улсын байгууллагад гүйцэтгэж буй үнэтэй хувь нэмэр нь улс орны бодлого төлөвлөлт, хөгжлийн үйл явцад туйлын чухал байр суурь эзэлдгийг онцлон тэмдэглэв. Тэрээр тэдний оюуны чадавхи, ёс зүй, мэргэжлийн ур чадвар нь Монгол Улсын нэр хүндийг дэлхийн тавцанд тасралтгүй өсгөж буйг өндөрөөр үнэлэв.

Мөн цаашдын хөгжлийн зорилтуудыг хэрэгжүүлэхэд дэлхийн өнцөг булан бүрт ажиллаж, амьдарч буй монгол иргэдийн оролцоо, санаачилга, олон улсад хуримтлуулсан туршлага үнэт хөрөнгө болдгийг онцолж, төр засаг тэдний үйл ажиллагааг үргэлж тууштай дэмжин ажиллах эрмэлзэлтэй байгааг илэрхийлэв.