Гадаад харилцааны сайд Б.Батцэцэг Тажикистан Улсын Элчин сайдыг хүлээн авч уулзлаа

Гадаад харилцааны сайд Б.Батцэцэг өнөөдөр /2025.11.25/ Бүгд Найрамдах Тажикистан Улсаас Монгол Улсад хавсран суугаа Онц бөгөөд Бүрэн эрхт Элчин сайд Ибодзода Хайруллог хүлээн авч уулзжээ.

Уулзалтын үеэр сайд Б.Батцэцэг Монгол Улс Төв Азийн орнууд, тэр дундаа Тажикистантай хөгжүүлж буй харилцаанд өндөр ач холбогдол өгдгийг онцолж, хоёр улсын улс төрийн яриа хэлэлцээ тогтмол болж, хамтын ажиллагаа бодит агуулгаар өргөжиж буйд сэтгэл хангалуун байгаагаа илэрхийлэв.

Тэрээр хөдөө аж ахуй, хөнгөн үйлдвэрлэл, сэргээгдэх эрчим хүч зэрэг салбарт хамтын ажиллагааг өргөжүүлэх өргөн боломж байгааг дурдан, цаашид хамтарсан төсөл, хөтөлбөрүүдийг хэрэгжүүлэхэд Монголын тал нээлттэй гэдгийг онцолсон юм.

Элчин сайд Ибодзода Хайрулло хоёр улсын найрсаг харилцаа, хамтын ажиллагааг улам гүнзгийрүүлэхийн төлөө ажиллахыг онцлон, ялангуяа эдийн засгийн хамтын ажиллагааг идэвхжүүлэх, Засгийн газар хоорондын комиссын анхдугаар хуралдааныг хэрэгжүүлэхэд түлхүү анхаарч ажиллахаа мэдэгдэв.

Эх сурвалж: ГХЯ