Сайдад нэр дэвшигч нарыг танилцуулж байна

УИХ-ын чуулганы ээлжит бус хуралдаан үргэлжилж байна. Чуулганы өнөөдрийн хуралдаанаар Засгийн газраас өргөн мэдүүлсэн Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн төсөл/хэлэлцэх эсэх/-ийг хэлэлцэж байна.  Засгийн газраас дээрх хуулийн төслийг яаралтай горимоор хэлэлцүүлэхээр өргөн мэдүүлээд байгаа юм. УИХ-ын чуулганд хуралдаанд оролцсон гишүүдийн олонхи нь энэхүү төслийг хэлэлцэх нь зүйтэй гэж үзсэн тул Эдийн засгийн байнгын хороонд шилжүүллээ. 

Мөн өнөөдөр Засгийн газрын гишүүнийг томилох, чөлөөлөх асуудалтай танилцах юм. Ерөнхий сайд онцгой бүрэн эрхийнхээ хүрээнд Хүнс хөдөө аж ахуй хөнгөн үйлдвэрийн сайдаас Ж.Энхбаярыг чөлөөлж Эдийн засаг, хөгжлийн сайдад нэр дэвшүүлж байгааг, мөн Хүнс хөдөө аж ахуй, хөнгөн үйлдвэрийн сайдад УИХ-ын гишүүн М.Бадамсүрэнг нэр дэвшүүлсэн талаараа танилцуулав.  Сайдад нэр дэвшигч нарыг өчигдөр Ерөнхийлөгчид танилцуулсан байна.