Мөсөнд цөмөрсөн автомашиныг татан гаргажээ

Сүүлийн хоёр хоногт улсын хэмжээнд зам, цаг агаарын нөхцөл хүндрэснээс үүдэн иргэд осолд өртсөн тухай дуудлагууд Онцгой байдлын байгууллагад дараалан иржээ. Тухайлбал, 2025 оны арваннэгдүгээр сарын 23-ны өдөр Ховд аймгийн Мянгад сумын нутагт зорчиж явсан гурван зорчигчтой суудлын автомашин мөсөнд цөмөрсөн тухай дуудлага бүртгэгджээ.  Онцгой байдлын газрын Эрэн хайх, аврах ангийнхан очиход иргэн Г-ийн Toyota Town Ace автомашин нуурын эргээс 800 метрийн зайд мөсөнд цөмөрсөн байсныг татан гаргажээ.

Түүнчлэн арваннэгдүгээр сарын 24-нд Говьсүмбэр аймгийн Сүмбэр сумын нутагт зургаан зорчигчтой суудлын автомашин цасанд суусан дуудлага бүртгэгдсэн байна. Эрэн хайх, аврах бүлгийн алба хаагчид очиход иргэн А-ын Toyota Prius-41 автомашин цасанд суусан байсныг татан гаргаж, хөдөлгөөнд оруулжээ. Мөн Дундговь аймгийн Луус сумын Буянт багийн орчимд нэг автомашин цасанд суусан дуудлага ирсэн байна. Алба хаагчид очиход иргэн С-ийн Toyota Prius-30 загварын, 3 зорчигчтой автомашин цасанд суусан байсан бөгөөд ажиллаж татан гаргажээ.

Онцгой байдлын байгууллага иргэдийг өвлийн цагийн нөхцөл байдал хүндэрч буйтай холбогдуулан цас, мөсөн дээр зорчихдоо болгоомжтой байх, шаардлагагүй үед холын замд гарахгүй байхыг анхааруулж байна.