“Чингис хааны удмын хутагт: Дорнын их сэргэн мандалт” тусгай үзэсгэлэн нээлтээ хийлээ

“ЧИНГИС ХААНЫ УДМЫН ХУТАГТ: ДОРНЫН ИХ СЭРГЭН МАНДАЛТ” СЭДЭВТ ТУСГАЙ ҮЗЭСГЭЛЭН НЭЭЛТЭЭ ХИЙЛЭЭ

Өвлийн тэргүүн сарын шинийн нэгний билигт сайн өдөр, “Монгол бахархлын өдөр”-т зориулсан “Чингис хааны удмын хутагт: Дорнын их сэргэн мандалт” тусгай үзэсгэлэн өнөөдөр нээлтээ хийлээ.

Уг үзэсгэлэнг нээж Соёл, спорт, аялал жуулчлал, залуучуудын сайд Ч.Ундрам үг хэлэв. Тэрээр хэлэхдээ, “Бид Өндөр гэгээн Занабазарын алдар нэрийн эргэн тойронд оршин буй сэдэв бүрийг сурвалжлан судлах үйл ажиллагааг өргөн цар хүрээтэй зохион байгуулж, үнэ цэнэт байдлыг тодотгон, хуримтлагдсан мэдлэг бүрийг хүмүүст хүртээмжтэй түгээх нь хүүхэд залуучуудад эх оронч үзлийг төлөвшүүлэх, улс орныхоо нэгдмэл байдлыг бэхжүүлэх үйлсэд хувь нэмэр оруулах ач холбогдолтойг тэмдэглэн хэлэхийг хүсэж байна.” хэмээв.

Үзэсгэлэнд Чингис хаан Үндэсний музей, Монголын Үндэсний музей, Богд хааны ордон музей, Чойжин ламын сүм музейн сан хөмрөгт хадгалагдаж буй Өндөр гэгээний мутрын болон дэг сургуулийн 40 гаруй хосгүй үнэт бүтээлийг дэлгэв.

Нээлтийн арга хэмжээнд Соёл, спорт, аялал жуулчлал, залуучуудын сайд Ч.Ундрам, Гадаад харилцааны сайд Б.Батцэцэг, МУ-ын Ерөнхийлөгчийн Соёл, шашны бодлогын зөвлөх Б.Сэргэлэн, төр нийгмийн зүтгэлтнүүд, ШУА-ийн хүрээлэнгийн захирлууд, Академичид, Монгол Улсад суугаа Элчин сайдын яамны төлөөлөл болон бусад албаныхан, эрдэмтэн судлаачид оролцлоо.

“Чингис хааны удмын хутагт: Дорнын их сэргэн мандалт” үзэсгэлэн нь 11 дүгээр сарын 29-ний өдрийг хүртэл Чингис хаан Үндэсний музей-н 9 давхрын тусгай үзүүллэгийн танхимд өдөр бүр нээлттэй байх тул та бүхнийг өргөнөөр хүрэлцэн ирэхийг урьж байна.