Монгол улсаас ЮНЕСКО-д бүртгэгдсэн соёлын өвийн батламжийг гардуулах ёслолын арга хэмжээ боллоо

Их эзэн Чингис хааны мэндэлсэн өдөр буюу “Монгол бахархалын өдөр”-өөр Монгол Улсаас ЮНЕСКО-д бүртгэгдсэн соёлын өвийн батламжийг гардуулах ёслолын арга хэмжээг Чингис хаан Үндэсний музейд зохион байгууллаа. 

Ёслолын арга хэмжээнд Соёл, спорт, аялал жуулчлал, залуучуудын сайд Ч.Ундрам, Гадаад харилцааны сайд бөгөөд ЮНЕСКО-ийн Монголын Үндэсний комиссын дарга Б.Батцэцэг оролцож, мэндчилгээ дэвшүүлэв.

Монгол Улсаас ЮНЕСКО-ийн Дэлхийн өвийн жагсаалтад 2023 онд бүртгэгдсэн “Буган чулуун хөшөө, Хүрлийн үеийн холбогдох дурсгалууд” өв, Хүн төрөлхтний соёлын биет бус өвийн төлөөллийн жагсаалтад 2024 онд бүртгэгдсэн “Монгол нүүдлийн зан үйл”, “Наурыз” өв, Дэлхийн дурсамж хөтөлбөрийн Баримтат өвийн олон улсын жагсаалтад 2025 онд бүртгэгдсэн “Хүйс толгойн хөшөөний бичээс”, “Дээрээс тогтоосон дүрсийн тус бүрийг бүртгэсэн бичиг” өвийн батламжийг дээрх өвүүдийн судалгааны ажлыг зохион байгуулж, номинацийн материалыг бэлтгэн, ЮНЕСКО-д бүртгүүлэхэд оролцсон төрийн байгууллага, эрдэмтэн судлаачдын төлөөлөлд гардууллаа.   

• Өнөөдрийн байдлаар манай улс Дэлхийн өвийн жагсаалтад соёлын ангиллаар 4 өвийг, Хүн төрөлхтний соёлын биет бус өвийн төлөөллийн жагсаалт болон Яаралтай хамгаалах шаардлагатай соёлын биет бус өвийн жагсаалтад 17 өвийг, “Дэлхийн дурсамж” хөтөлбөрийн олон улсын болон бүс нутгийн баримтат өвийн жагсаалтад 10 өвийг тус бүр бүртгүүлээд байна. Энэ бол Монгол хүн бүрийн үндэсний бахархал, нэгдмэл үнэт зүйлийн нэг хэсэг юм.