Ч.Номин: Ард түмний төлөөлөл болсон УИХ-ын гишүүд ундааны лаазаар удирдуулж байгааг хараад нүдэндээ итгэсэнгүй

Өнгөрөгч Баасан гарагийн үдээс хойших УИХ-ын чуулганы хуралдаанаар 2026 оны улсын төсвийн тухай болон холбогдох хуулийн төслүүдийн талаар санал хураалт явагдсан.  Ингэхдээ  улаан, ногоон өнгийн ундааны лаазыг дохио болгон ашигласанд  зарим УИХ-ын гишүүдэд таалагдсангүй. Энэ талаар гишүүд өөрсдийн байр сууриа илэрхийлж байна. 

УИХ-ын гишүүн Ч.Номин өөрийн цахим хуудсандаа "Улс орны хувь заяаг шийддэг чуулганы танхимд, ард түмний төлөөлөл болсон УИХ-ын гишүүд ундааны лаазаар удирдуулж байгааг хараад нүдэндээ итгэсэнгүй.

2026 оны улсын төсвийн зарчмын зөрүүтэй санал хураах үеэр Төсвийн байнгын хорооны дарга Х.Ганхуяг (Монгол Улсын шадар сайдаар томилогдох гэж буй) ундааны НОГООН ЛААЗ өргөж дохиход, бусад гишүүд нь НОГООН КНОПОО дарж байв.

Эрх мэдэл, албан тушаал, хүсэл шуналд нь хязгаар үгүй болсон ч, арай ч ийм “бусармаг” улс төр хийж болохгүй. Сөрөг хүчин Ардчилсан намын гишүүдийг хүртэл ногоон, улаан ундааны лаазаар удирдав.

Хамгийн харамсалтай нь, С.Эрдэнэбат гишүүний гаргасан “Төрийн урсгал зардлыг бууруулж, хөгжлийн бэрхшээлтэй хүүхдийн амьжиргааг тэтгэх мөнгөн тэтгэмж, асаргааны тэтгэмж, нийгмийн халамжийн тэтгэврийг 24 хувиар нэмэгдүүлэх”, Д.Ганмаа гишүүний гаргасан “Төрийн урсгал зардлыг бууруулж, эмч, сувилагч, эмнэлгийн ажилтнуудын цалинг 50 хувиар нэмэх” саналуудыг ногоон, улаан өнгөтэй ундааны лаазаар удирдан унагалаа.

Үүний оронд 1.1 их наяд төгрөгөөр сөрөг хүчинтэйгээ наймаалцаж, төрийн бодлого, хууль журмыг гууль болгож байгаад харамсаж байна.

Монгол улс Үндсэн хуулиараа Парламентын засаглалтай улс гэж баталгаажуулсан. УИХ-ын гишүүдийн өөрийн итгэл үнэмшлээр санал өгөх, шийдвэр гаргах эрхийг “циркийн амьтад” шиг УНДААНЫ ЛААЗААР удирдаж байгааг эсэргүүцэж байна!