Гурван настай хүүг онц хэрцгийгээр зодож хөнөөсөн хэргийн шүүхийн урьдчилсан хэлэлцүүлэг өнөөдөр боллоо

Хоёр жилийн өмнө гурван настай хүүг онц хэрцгийгээр зодож тарчлаан амь насанд нь хүрсэн харамсалтай хэрэг гарсан. Хүү Турк улсын эмнэлэгт эмчлүүлсэн хэдий ч долоон сарын дараа өвчнөө даалгүй бурхан болсон. 

Өнгөрсөн долоо хоногт яллагдагч өөрийн өмгөөлөгчийг солих хүсэлт гарган хэргийн урьдчилсан хэлэлцүүлэг хойшлогдсон талаар мэдээлэл хүргэсэн. Тэгвэл 2025.11.03 буюу өнөөдөр урьдчилсан хэлэлцүүлгээр хэргийн шинжээч нарын дүгнэлт зөрсөн тул прокурорт буцааж нэмэлт мөрдөн шалгах ажиллагаа явуулж хэрэгтэй гэж үзжээ.

Прокуророос яллагдагч М.Энхбилэгийг Эрүүгийн хуулийн 10.1-2.1, 2.7, 2.8-д зааснаар буюу гэр бүлийн хүчирхийлэл үйлдэж, онц хэрцгий аргаар, хохирогчийг биеэ хамгаалж чадахгүйг мэдсээр байж хүнийг алсан гэмт хэрэг үйлдсэн хэмээн яллах дүгнэлт үйлдсэн. Мөн хохирогчийн эх Ц.Лхагважавыг Эрүүгийн хуулийн 16.7-2, 16.11-3-т зааснаар буюу хүүхдийг асран хамгаалах үүргээ биелүүлээгүйн улмаас хүүхэд амь насаа алдсан хэмээн буруутгаж яллах дүгнэлт үйлдэн шүүхэд ирүүлсэн байна.