2011 онд эхэлсэн дуурийн театрын барилга ирэх онд 8.6 тэрбум төгрөгийн санхүүжилт авна

Дундговь аймгийн Сайнцагаан суманд "Төв халх" дуулалт жүжгийн театр баригдах эхлэлийг 2011 онд тавьжээ. Тус барилгын анхны төсөвт өртөг 6.8 тэрбум төгрөг байсан бол 14 жил дамнасан уг барилгын төсөвт өртөг 2026 онд 32.9 тэрбум төгрөгт хүрч, ирэх 2026 онд 8.6 тэрбум төгрөгийн санхүүжилт олгохоор байна. Мөн 2012 онд Архангай аймгийн Эрдэнэбулган суманд Аймгийн хөгжимт драмын театрын барилга барих ажил эхэлжээ. Тус барилгын анхны төсөвт өртөг 7.1 тэрбумаас 26 тэрбум болж өсчээ. Энэ онд 5.3 тэрбум төгрөгийн санхүүжилт авахаар улсын төсөвт суужээ. 

Жил дамнаж төсөвт өртөг нь нэмэгдсэн соёлын төвүүдийг орон нутагт барих зайлшгүй шаардлага бий юу гэх асуулт гишүүдийн дунд өрнөж шүүмжлэл дагуулаад буй. УИХ-ын гишүүн М.Мандхай энэ талаар, "Маш их тэвчиж болох зардлууд байна. Тухайлбал, Ховд аймгийн нэг суманд 8 жил баригдаад дуусдаггүй нэг үйлдвэр байна. 2018 оноос хойш жил бүр улсын төсвөөс татаас авдаг. 2026 онд 6,7 тэрбум төгрөг төсөвлөсөн байна" гэж шүүмжилсэн байдаг.  Нөгөө талд багш, эмч нар цалингаа нэмэгдүүлэхээр сар дамнан суулт зарлаж, ажил хаялт хийгээд буй. Засгийн газраас багш нарын цалинг хүссэн дүнд буюу 3.5 саяд хүргэх боломжгүй бөгөөд үе шаттай нэмэгдүүлэх асуудлыг ярьж буй юм. Гэтэл ирэх оны төсвийн төсөлд хэмнэж болох энэ мэт зардлууд багтаж буй нь анхаарал татна. 

Таваас дээш жил дамнан баригдаж, төсөвт өртөг нь нэмэгдэж буй соёлын төвийн барилгуудын жагсаалт ийнхүү үргэлжилнэ. Танилцана уу.