Оюутолгойн зээлийн хүүг бууруулах хэлэлцээрээс хүлээх хүлээлт

Оюутолгойн зээлийн хүүг бууруулах хэлэлцээрийг энэ сарын 27-31-ний хооронд зохион байгуулах саналыг   "Рио Тинто" хүлээн зөвшөөрсөн талаар Засгийн газар мэдэгдсэн.  Товд зааснаар хэлэлцээр өнөөдөр эхэлнэ. "Рио Тинто"-гоос асуудлыг газар дээр нь шийдэх эрх мэдэл бүхий 10 хүний бүрэлдэхүүнтэй баг Монгол руу гарсан гэсэн мэдээлэл өнгөрсөн долоо хоногийн сүүлээр хэвлэлд гараад байсан юм. 

Монголчууд Оюутолгой төслийг 2009 онд гараанаас гаргах эрхийг хөрөнгө оруулагч талд өгч, бүтээн байгуулалтын ажилд 6.1 тэрбум ам.долларын хөрөнгө оруулалт хийхийг хүлээн зөвшөөрсөн байдаг. Өнгөрсөн 16 жилийн хугацаанд 12 тэрбум ам.долларын өртэй болжээ. Үүний тал хувь нь хуримтлагдсан хүү гэсэн үг.

Хэрвээ өөрчлөлт оруулахгүй энэ чигээрээ явбал 2037 онд зөвхөн хүүнд 18 тэрбум ам.доллар төлж, үндсэн санхүүжилтээ нэмэхээр нийтдээ 24 тэрбум ам.долларыг Рио Тинто-д төлөх тооцоолол гарсан байна. Оюутолгойн ил, далд уурхайн бүтээн байгуулалтад нийт 26 тэрбум ам.доллар зарцуулчихаад зээлийн хүүгийн үелсэн схемээрээ буцаагаад зардлаа бүрэн барагдуулчихвал Хөрөнгө оруулагч талд ашигтай. Харин Оюутолгой төслийн 34 хувийг эзэмшигч Монголын Засгийн газарт ашиггүй. 

2025 онд л гэхэд Рио Тинто-д төлөх зээлийн хүүгийн төлбөр л гэхэд 1.3 тэрбум ам.доллар  буюу 4.7 их наяд төгрөг байна. Тодруулбал, өдөр бүр 10 тэрбум төгрөг төлж байгаа гэсэн үг. 

"Оюутолгой" төслийн санхүүжилтэд зориулж авсан зээлийн хүүг бууруулах хэлэлцээрт манай талаас тавих шаардлагуудыг Б.Жавхлан сайд дараах байдлаар танилцуулж байсан юм. 

1. Зээлийн хүүг эргэж харах хугацаа долоон жил байгааг гурван жил болгох,
2. 11.5 хувь байгаа зээлийн хүүг Монгол Улсын зээлжих зэрэглэлд зохицуулан буулгах,
3. Хүүгээс хүү тооцдог бүдүүлэг байдлыг болиулах“, “Менежментийн төлбөр тооцох аргачлал,
хувь хэмжээг бууруулах”