16 настай охины амийг хөнөөсөн хэрэгт Н болон Г нарыг 30 хоногийн хугацаагаар цагдан хорилоо

Дүүргийн эрүү, иргэний хэргийн хялбар ажиллагааны анхан шатны тойргийн шүүх өнгөрсөн баасан гаригт (2025 оны 10 дугаар сарын 24-нд) хуралдаж, Э.Номин-Эрдэнэ, Э.Ган-Эрдэнэ нарыг 16 настай охины амийг хөнөөсөн хэрэгт хамжигчаар оролцсон гэж үзэн 30 хоногийн хугацаагаар цагдан хорих шийдвэр гаргалаа.

Шүүхийн шийдвэрт дурдсанаар

“Нийслэлийн прокурорын газраас яллагдагч Э.Г болон Э.Н нарыг бусдыг санаатайгаар гэмт хэрэг үйлдэхэд дэмжлэг үзүүлж, хүнийг алах гэмт хэргийн хамжигчаар хамтран оролцсон, мөн Э.Н-г ‘эс үйлдэхүй’-ээр бусдыг санаатайгаар гэмт хэрэг үйлдэхэд дэмжлэг үзүүлж, хүнийг алах гэмт хэргийн хамжигчаар хамтран оролцсон хэрэгт холбогдуулан яллагдагчаар татаж, Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 3 дахь хэсэгт заасан үндэслэлээр цагдан хорих таслан сэргийлэх арга хэмжээ авах тухай санал ирүүлснийг 2025 оны 10 дугаар сарын 24-ний өдөр хүлээн авч, мөн өдөр хянан хэлэлцэв” гэжээ.

Шүүхээс үзэхдээ, яллагдагч Э.Г, Э.Н нар нь хүнд ангиллын гэмт хэрэгт холбогдон шалгагдаж байгаа бөгөөд Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 3 дахь хэсэгт заасан цагдан хорих үндэслэл байгаа нь прокуророос танилцуулсан баримтаар нотлогдож байна гэж үзсэн байна.

Иймд 2025 оны 10 дугаар сарын 24-ний өдрөөс эхлэн нэг сарын хугацаагаар цагдан хорих таслан сэргийлэх арга хэмжээ авах шийдвэрийг тус шүүх гаргажээ.