“Алтан цом”-ын барилдаан өнөөдөр Монгол бөхийн өргөөнд ​12:30 цагт эхэлнэ

Монголын үндэсний бөхийн холбооны 2025–2026 оны улирлын “Алтан цом”-ын барилдаан өнөөдөр Монгол бөхийн өргөөнд 12:30 цагт эхэлнэ.

Өмнөх жилийн аваргын төлөөх барилдаан ширүүн өрсөлдөөнтэй болж, хамгийн олон үзэгчдийг татсан спортын арга хэмжээний нэг болсон билээ. Энэ удаа ч мөн хүчтэй өрсөлдөөн, сонирхолтой барилдаанууд болох төлөвтэй байна. 

Барилдаан багийн оноогоор явагдах бөгөөд тойргийн онооны нийлбэр дүнгээр хамгийн өндөр амжилт үзүүлсэн багууд дараагийн шатанд шалгарах журамтай. “Алтан цом”-ын тэмцээн нь бөхчүүдийн ур чадварыг сорих, уран барилдаан, багийн зохион байгуулалтыг үнэлэх зорилготойгоор жил бүр уламжлал болгон зохион байгуулагддаг.

Энэ удаагийн “Алтан цом” барилдааны нэгдүгээр тойрогт М-Си-Эс Энержи баг, ОД Групп-ийн баг, АПУ-Скайтел баг, Хүлэгү багууд хүч үзэх юм.  Тэмцээнийг Үндэсний бөхийн холбооны албан ёсны хуудсаар болон телевизийн шууд дамжуулалтаар үзэх боломжтой.