Өнөөдөр НҮБ-ын 80 жилийн ой тохиож байна

Даян дэлхийд энх тайван тогтоож, хүний эрхийг хамгаалж, хөгжил дэвшлийг хамтран тунхагласан НҮБ-ын Дүрэм хүчин төгөлдөр болсон 10 дугаар сарын 24-ны өдрийг “НҮБ-ын өдөр” хэмээн тэмдэглэдэг уламжлалтай билээ. Энх тайван, хамтын ажиллагаа, хүн төрөлхтний нийтлэг үнэт зүйлсийг бэхжүүлэх үйлсэд зориулагдсан Нэгдсэн Үндэстний Байгууллага (НҮБ) энэ онд 80 жилийн ойн баяраа угтаж байна.

1945 оны 10 дугаар сарын 24-нд НҮБ-ын дүрэм хүчин төгөлдөр болж, дэлхий дахины ард түмэн дайн дажингүй, энх амгалан ертөнцийг цогцлоох хамтын итгэл, зорилгоор нэгдсэн түүхтэй. Тэр цагаас хойш жил бүрийн энэ өдрийг “НҮБ-ын өдөр” хэмээн дэлхий нийтээр тэмдэглэж ирсэн уламжлалтай.
НҮБ байгуулагдсанаар хүн төрөлхтөнд:
Энх тайвныг сахин хамгаалах,
Хүний эрх, эрх чөлөөг дээдлэх,
Нийгмийн шударга ёс, хөгжлийн боломжийг тэгш хангах зэрэг нийтлэг үнэт зүйлсийг дэлхийн хэмжээнд тунхаглан хэрэгжүүлэх зам нээгдсэн билээ.
Өнөөдөр, 80 жилийн дараа НҮБ дэлхийн 190 гаруй улсыг нэгтгэн, уур амьсгалын өөрчлөлтөөс эхлээд хүний эрх, ядуурал, боловсрол, тогтвортой хөгжлийн зорилтууд хүртэл хүн төрөлхтний өмнө тулгарч буй сорилтуудыг хамтын хүчээр даван туулахын төлөө ажиллаж байна.
Монгол Улс НҮБ-д 1961 онд элсэж, гишүүн орны хувьд дэлхий нийтийн энх тайван, тогтвортой хөгжлийн үйлсэд идэвхтэй хувь нэмэр оруулсаар ирсэн билээ.