Монголын хүүхдийн ордны баруун хойд уулзварт явган хүний гарц нэмэгдүүлэхээр судалж байна

НИТХ-ын дарга А.Баяраар ахлуулсан түгжрэлийг богино болон дунд хугацаанд бууруулах ажлын хэсгийн бүрэлдэхүүн Монголын хүүхдүүдийн ордны баруун хойд уулзварыг Скайтелын уулзвартай холбосон явган хүний гарц нэмэгдүүлэхээр ажиллаж байна.

Төв номын сангийн урд буюу Скайтелын явган хүний гарц, Монголын хүүхдийн ордны баруун хойд уулзварт байрлах явган хүний гарц нь ачаалал ихтэй бөгөөд тухайн байршилд өөр явган хүний гарцгүй байна. Тухайлбал, Номын сангийн урд буюу Скайтелын явган хүний гарцаар 1 цагт дунджаар 700 хүн нэвтэрдэг ачаалал ихтэй гарц юм. Ялангуяа авто замын оргил ачааллын үед буюу Энхтайваны гүүрээс Төв шуудангийн уулзвараас урагш, хойш чиглэсэн хөдөлгөөний ачааллыг бууруулж түгжрэлийг татах үед явган зорчигчид тус гарцад хүлээх минут нэмэгддэг байна. Тиймээс хүйтний улирал эхлэж байгаатай холбогдуулан явган зорчигчдын гарц дээр хүлээх хугацааг багасгах, өөр шинэ гарц нэмэгдүүлж ачааллыг бууруулах талаар нөхцөл байдалтай танилцаж ажиллалаа. Ингэхдээ авто машины хөдөлгөөнд саад учруулж түгжрэл үүсгэхгүй байдлаар Скайтелын явган хүний гарцыг урагшаа шилжүүлэх эсвэл уулзваруудыг холбосон диагональ гарцтай болгох хувилбаруудын талаар ажлын хэсгийнхэн зөвлөлдлөө. Мөн Замын хөдөлгөөний удирдлагын төвөөс явган хүний гүүрэн гарц тавих талаар гаргасан саналыг судалж тооцоолол хийж үзэхийг үүрэгдлээ. Гэхдээ гүүрэн гарц нь хотын үзэгдэх орчныг хаах, газар доор төв шугамд нөлөөлөх, санхүүгийн зардал өндөр гээд зохимжтой хувилбар биш гэдэгт ажлын хэсгийнхэн санал нэгдлээ.

Иймд НИТХ-ын дарга А.Баяр “Тухайн байршилд явган хүний гарц нэмэгдүүлэхдээ аль ч хувилбараар байсан явган зорчигчдын гэрлэн дохио хүлээх хугацааг багасгах, эргэх уулзваруудад жолооч нарт хүндрэл учруулж ямар нэг өөрчлөлт оруулахгүй байхаар зохицуулалтыг хийх хэрэгтэй” гэдгийг онцоллоо.Түүнчлэн дээрх гарц нэмэгдүүлэх боломжтой хувилбаруудыг судалж, дараагийн хуралд танилцуулахыг холбогдох албаныханд даалгалаа. Энэ дагуу Нийслэлийн Замын хөгжлийн газар, Замын хөдөлгөөний удирдлагын төв, Тээврийн цагдаагийн алба, Нийслэлийн газар зохион байгуулалтын алба хамтран гарц нэмэгдүүлэх боломжтой хувилбаруудыг судалж байна.