​Мэдээллийн технологийн үндэсний парк 14 жилийн дараа бүрэн хүчин чадлаараа ажиллах боломж нээгдлээ​

2025 оны 3-р сарын 31-ний 22:35 цагт Иргэний хэргийн анхан шатны шүүхээс Мэдээллийн технологийн Үндэсний Парк (МТҮП) болон Өргөө-2 кино театрын хооронд үүссэн өмчлөлийн маргааныг МТҮП-ийн талд шийдвэрлэсэн тухай албан ёсоор мэдэгдсэн билээ.

Шүүхийн шийдвэрийн дагуу МТҮП нь хууль ёсныхоо дагуу өмчлөлийн байрныхаа эзэмшлийг буцаан авах эрхтэй гэж тогтоож, Өргөө-2 кино театрыг албадан чөлөөлөх шийдвэр гаргасан юм.
Үүний дараа Нью Тур Сафарис ХХК давж заалдсан бөгөөд 2025 оны 10-р сарын 3-нд Дээд шатны шүүх анхан шатны шүүхийн шийдвэрийг хэвээр үлдээх шийдвэр гаргалаа. Ингэснээр Мэдээллийн технологийн Үндэсний Парк 14 жилийн дараа бүрэн хүч чадлаараа ажиллах, шинэ технологи, инновацын экосистемийг бүрдүүлэх боломж нээлттэй боллоо.
Энэхүү шүүхийн шийдвэр нь зөвхөн өмчлөлийн асуудлыг шийдвэрлэсэн үйл явдал биш бөгөөд Монгол Улсын технологийн салбарын хөгжил, дижитал инновац, стартап экосистемийн урагшлах хөшүүрэг болох чухал алхам юм.
МТҮП нь цаашид төр, хувийн хэвшил, стартап байгууллагууд болон олон улсын түнш байгууллагуудтай хамтран, шинэ санаачилга, судалгаа, боловсрол, технологийн бүтээлч үйлдвэрлэлийг дэмжих бодит орон зайг бүрдүүлэхээр зорьж байна.