НӨАТ-ын буцаан олголтыг 5 хувь болгож, нийт иргэдийн 80 хувь буцаан олгодог системийг нэвтрүүлнэ

Шинэ Засгийн газар байгуулагдсанаас хойших 100 хоногийн хугацаанд гүйцэтгэсэн ажлуудаа Ерөнхий сайд Г.Занданшатар танилцууллаа. 

Инфляц тогтворжсон. 7-р сард төсөв 541 тэрбумын алдагдалтай байсан бол наймдугаарр сард 52 тэрбумын ашигтай гарсан. Энэ бол манай 100 хоногийн ажлын бодит үр дүн.

2.2 их наяд төгрөгийн үргүй зардлыг хэмнэсэн

 Гадаад томилолтоос эхлээд, төсвийн маш олон зарлагыг танасан. Төрийн албан хаагчдын тоог багасгаж, дарга нарын тоог цөөрүүлснээр 261 тэрбум төгрөг, нэг удаагийн тэвчиж болох зардлуудыг танаснаар 370 тэрбум төгрөг, хэрэгжээгүй болон үр ашиггүй төслүүдийг зогсоосноор 617 тэрбум төгрөгийг хэмнэсэн. Мөн дулааны үнийг нэмэхгүй байх шийдвэр гаргаж 122 тэрбум төгрөг төсөвт нэмж суулгасан. 

Эдийн засгийн хямрал зогсож, сэргэлт бий боллоо

Экспортын орлого 3.8 тэрбум ам.доллараар өсөж, эхний 5-6 сард 5.4 тэрбум байсан бол 9.2 тэрбум ам.доллар болж нэмэгдсэн. Үүний үр дүнд валютын тэнцэл ашигтай гарч, гадаад валютын нөөц 5.7 тэрбум ам.доллар болж, бараг 1 тэрбумаар өссөн. Валютын ханшийг интервенц хийхгүйгээр тогтвортой барьж чадсан.

НӨАТ-ын буцаан олголтыг 5 хувь болгов

Дижитал шилжилтийн хүрээнд и-баримтыг цаасгүй болгож, хиймэл оюун ухааны үндэсний стратегийг баталлаа. Цагдаагийн байгууллагын шинэчлэлийг эхлүүлсэн. Виртуал бүс байгуулж, татварын хөнгөлөлт үзүүлэх нөхцөл бүрдүүлсэн.

Төсвийн хувьд НӨАТ-ын буцаан олголтыг 5 хувь болгож, нийт иргэдийн 80 хувь нь жилдээ 2 сая төгрөгийн буцаан авалт авах боломжтой болсон. Энэ бол иргэдийн оролцоотой, хяналттай төсвийн шинэчлэл юм.