Өндөршил сумын эрүүл мэндийн төвийн барилга эрүүл мэндэд хохирол учрах хэмжээнд очжээ

Дундговь аймгийн Өндөршил сумын Эрүүл мэндийн төвийн барилга нь 1988 онд ашиглалтад орсон бөгөөд хана нь нэвт цууралт өгсөн, дээврээс гоождог, цонх, хана, шал таазны дулаан алдагдал ихтэй, сантехник болон цахилгаан монтаж муудсан дотроо ус, бохирын системгүй учир хэвтэн эмчлүүлэгч, үйлчлүүлэгчид төдийгүй эмч, сувилагч эмнэлэгийн байгууллагын ажилчдын ажиллах орчин нөхцөл асар хүндэрч цаашид энэ барилгад үйл ажиллагаагаа үргэлжлүүлвэл хүний амь нас, эрүүл мэндэд хохирол учрах хэмжээнд очсон. 

Тус эмнэлгийн барилгаас шалтгаалж өвөлдөө эмчлүүлэгч нар эмнэлэгт бус гэрийн эмчилгээ авдаг. Иргэд сумынхаа эмнэлэгт хэвтэн эмчлүүлбэл нэмэлт цахилгаан халаагуур, тень болон дулаан хөнжил, зузаан үстэй хувцас бэлтгэдэг хүнд нөхцөлтэй.
Мөн Дундговь аймгийн Өндөршил сум нь алслагдмал сум бөгөөд аймгаасаа 196 км алслагдмал хамгийн ойр 2 дах шатлалын эмнэлэг болох Говьсүмбэр аймгийн Нэгдсэн эмнэлэг хүртэлх зай шороон замаар 140 км.

Уг барилгыг цаашид ашиглах боломжгүй учраас аймгийн Эрүүл мэндийн газар, Эрүүл мэндийн яамны хөрөнгө оруулалтын газар зэрэг байгууллагуудад 2019 оноос хойш уламжилж 2025 онд сумын Орон нутгийн хөгжлийн сангийн санхүүжилтээр 10 ортой шинэ Эрүүл мэндийн төвийн барилгыг зураг төсвийг хийлгэж магадлалаар баталгаажуулсан.

Улсын төсөвт иргэдийн оролцоог хангах санал асуулгад сумын иргэд саналаа өгсөн.
Мөн сумын ЗДТГазар болон аймгийн Эрүүл мэндийн газар, аймгийн ЗДТГазрын хөрөнгө оруулалт хариуцсан мэргэжилтэнгүүд улсын төсвийн нэгдсэн мэдээллийн сангийн цахим системд хууль, журмын дагуу мэдээллийг шивж оруулсан.
Төсвийн хөрөнгө оруулалтын хууль журмын дагуу цахим системд шивж оруулан яаманд хүргүүлсэн боловч 2026 оны улсын төсвийн төслийн жагсаалтад ороогүй байна.