Намрын чуулганы нээлтээр УИХ-ын дарга Д.Амарбаясгалан юуг онцлов?

Байнгын ажиллагаатай парламентын 35 жилийн ойтой давхацсан УИХ-ын 2025 оны намрын ээлжит чуулганыг нээж хэлсэн Д.Амарбаясгалан даргын үг маш олон асуудлыг багтааснаараа онцлог байлаа. Учир нь тэр энэ өдөр үе үеийн парламентын дарга, гишүүд, Засгийн газрын тэргүүн нарт хандаж иргэнийхээ төлөө ажиллахыг сануулсан нь анхаарал татав. УИХ-ын дарга Д.Амарбаясгалангийн хэлсэн үгнээс харвал 11 байнгын хороогоо 8 болгож танасан парламент эрх зүйн гурван төгөлдөршлөө үргэлжлүүлнэ. Хүн төвт бодлогынхоо хүрээнд хөрсөн дээрээ бууж ажиллахаа илэрхийлчихлээ. Зуншлага тааруу газар нутагт өвөлжилтдөө бэлтгэх, улс даяараа эрчим хүчний бэлэн байдлаа хангах, салбар бүр хариуцлагатай ажиллахыг Засгийн газарт анхааруулсан. Харин хууль тогтоох дээд байгууллагын зүгээс хаврын чуулганаар баталсан төрийн үйлчилгээнд процессын дахин инженерчлэл явуулах тогтоолын хэрэгжилтэд хяналт тавина. Эрчим хүч, татвар, нийгмийн даатгалын салбарт эрх зүйн шинэчлэл хийнэ. Тэр бүү хэл, хүн амын дунд хорт хавдрын өвчлөлийн суурь гэгдэж байгаа Д аминдэмийн дутагдлыг хүүхэд багачуулд нөхөхөөс эхлээд үдийн хоол хөтөлбөрийн төсвийг нэмж, боловсрол, эрүүл мэндийн үйлчилгээг чанаржуулахад бодлого явуулна гэсэн юм. Төр бизнесийн орчинд өрсөлддөг, хувийн хэвшил дангаар гүйцэтгэх боломжтой ажилд хошуу дүрдэг байдлыг таслан зогсооно гэдгээ ч тунхаглан зарлачихлаа. Олон жил гацсан хөгжлийн саад тушаа, өмнөх нийгмээс улбаалсан хоцрогдсон арга барилыг хална гэсэн УИХ-ын даргын мэдэгдэл ч сонирхолтой. Түүний үгэнд 1,3 их наяд төгрөгийн алдагдалтай төсвийг Засгийн газраас оруулж ирснийг УИХ-ын гишүүд анхааралдаа авах ёстойг сануулав. Энэ бол Засгийн газрын 2026 оны улсын төсвийг гишүүд тийм ч амархан “кнопдчихгүй” гэдгийг хэлж байна. Хөрөнгө оруулалтын таатай орчин бүрдүүлэх, ирэх оны төсвийг өмнөхөөсөө олон үе шаттай буюу иргэд, олон нийтэд нээлттэй хэлэлцүүлэхийн тулд ийнхүү энэ парламент 2 дахь намрын чуулганаа анх удаа хагас сараар наашлуулж нээлээ.