С.Ганбаатар: АТГ Мөрдөн байцаах хуулиа зөрчиж байна

Өнөөдөр УИХ-ын намрын чуулган эхэллээ. Энэ үеэр УИХ-ын гишүүн С. Ганбаатараас түүнд холбогдох хэргийн талаар тодрууллаа. Тэрээр, "Намайг АТГ-ын 24 байцаагч шалгаж байна. Шалгах явцад тендер, авлигал, албан тушаалын гэмт хэрэг, лицензийн зөрчил байхгүйг тодорхойлсон. Тэдний сэжиглэж байгаа зүйл нь газрын хулгай. Би Монголын Үйлдвэрчний хороог 2007-2013 оны хооронд удирдаж байхад тухайн газар дээр нэг ч барилга баригдаагүй, нэг ч газрын зөвшөөрөл олгоогүй. МҮХ-ны Ерөнхийлөгч санхүүгийн болон, газрын зөвшөөрөлтэй холбоотой асуудалд оролцдоггүй. Гарын үсэг зурдаггүй гэсэн үг. Энэ бол хамтын удирдлагын байгууллага юм.

Гэтэл өнөөдөр АТГ-ын байцаагчид Ерөнхийлөгчөөс даалгавар авч улс төрийн захиалгат хэрэг үйлдэж байна гэж бодож байгаа. АТГ мөрдөн байцаах тухай хуулиа зөрчиж мөрдөж байцаалтын явцад цугласан материалаа худал мэдээлэл тарааж, намайг гүтгэхэд ашиглаж байна. Гэм буруутай гэвэл надад нэг л буруу бий. Ерөнхийлөгчийн өмнөөс үг хэлсэн нь, дуугүй байж чадаагүй нь л миний буруу" гэв.