Хүүхдийн тусламжийн 108 утсанд 1423 удаагийн дуудлага мэдээлэл бүртгэгджээ

Хүүхэд, гэр бүлийн хөгжил, хамгааллын ерөнхий газрын харьяа Хүүхдийн тусламжийн 108 утасны үйлчилгээний төвд сүүлийн долоо хоногийн хугацаанд нийт 1423 удаагийн дуудлага мэдээлэл бүртгэгджээ. Бүртгэгдсэн дуудлага мэдээллийн 270 хүүхдийн эсрэг зөрчил болон хүүхэд хамгааллын дуудлага, 93 зөвлөгөө хүссэн, 647 мэдээлэл хүсэж холбогдсон дуудлага ирсэн байна.

Үүнээс гадна цахим хэрэгсэл буюу чат үйлчилгээгээр дамжуулан 23 хүүхэд холбогдсон бол мессеж үйлчилгээнд 29 холбогдон заавар зөвлөгөөг мэргэжилтнүүдээс авчээ. Үүнээс гадна зорилтод бус дуудлага 409 бүртгэгдсэн аж. Хүүхдийн тусламжийн 108 утасны үйлчилгээний төвд ирсэн дуудлагад хамтарсан багт 228 шилжүүлжээ. Дурдвал, нийслэлийн хэмжээнд 158, орон нутгийн хэмжээнд 70 дуудлага арга хэмжээ авч ажилласан байна. Хүүхдийн эсрэг бүртгэгдсэн дуудлагаас хүүхэд хамгааллын хариу үйлчилгээнд 41 хүүхэд хамрагдав. Тухайн хамгааллын үйлчилгээнд хамрагдсан хүүхдүүдийг түр хамгаалах байр болон нэгт цэгт хүүлгэн өгсөн талаар холбогдох албанаас мэдээллээ.

Жил бүр ойролцоогоор 110-120 мянган дуудлагыг хүүхэд, эцэг эхчүүдээс тус төв хүлээн авдаг ажээ. Нийт бүртгэсэн дуудлагын  50-60 хувь нь хүүхдийн тусламжийн утсаар ирдэг талаар мэргэжилтнүүд мэдээлж байна. Мөн өнгөрсөн сарын мөн үетэй харьцуулахад хүүхдийн тусламжийн 108 утсанд шинэ хичээлийн жил эхэлсэнтэй холбогдуулж дуудлага ихээр бүртгэгдсэн болсон байна. 2025 оны наймдугаар сарын 25-31-ны хооронд нийт 1012 дуудлага бүртгэгдэж, 34 дуудлагад хүүхэд хамгааллын хариу үйлчилгээ үзүүлсэн аж.