Зэсийн үнэ өсөж буй үед орд газруудаа илрүүлэх зайлшгүй шаардлагатай

Монгол Улсын Ерөнхий сайд Г.Занданшатар болон Аж үйлдвэр, эрдэс баялгийн сайд Г.Дамдинням нар Орхон аймгийн Баян-Өндөр, Жаргалант сумдын нутагт байрлах "Оюут" орд газрын бэлтгэл ажилтай танилцлаа.

"Та бид хайгуул,судалгаа, эрлийн ажил энэ салбарт ямар чухал болохыг бодитоор өнөөдөр харж байна.Улсын хэмжээнд хайгуулын тусгай зөвшөөрлийн тоо, ашиглалтын тусгай зөвшөөрлийнхөө тооноос хоёр дахин бага байна. 1,1 сая тн зэсийн нөөцтэй, 357.0 сая тн хүдрийн нөөцтэй Оюутын ордыг ашиглалтад оруулах болжээ. Тус ордод 1970-аад оноос хайгуулын ажил хийгдэж эхэлсэн байдаг.

Өөрөөр хэлбэл 50 жилийн дараа энэ орд уурхай болох суурь нь дөнгөж тавигдаж байна. Монгол Улсын Эрдэс баялгийн салбарын хувьд ирэх жилээс хайгуул, судалгааны ажлаа эрчимжүүлэх, хайгуулын тусгай зөвшөөрлийг олон төрлөөр олгох, хөрөнгө оруулалт татах, иргэдээ олон мянган ажлын байраар хангах асуудлыг ярих ёстой. Дэлхий нийтэд хүний насжилт, тоо өсөхийн хэрээр хэрэглээ нэмэгдэж байна. Хэрэглээ нэмэгдэхийн хэрээр бид ногоон болох тэмүүлэл рүү явна.

Машин дээр авч үзье. Энгийн машинд 50 орчим кг зэс ордог бол цахилгаан машинд 100 орчим кг зэс орох жишээтэй. Бидний барьж буй гар утаснаас авхуулаад зэс ороогүй юм байхгүй. Хэрэглээ өсөхийн хэрээр хүмүүсийн амьдралын чанар сайжирдаг. Зэсийн хэрэглээ өсөхийн хэрээр хүдрийн агуулга буурч байна. Өөрөөр хэлбэл нэг тн хүдэрт байгаа зэсийн хэмжээ буурна гэсэн үг. Энэ хэрээр бид олборлолтоо нэмэгдүүлж хэрэгцээгээ хангана. Тиймээс зэсийн үнэ өсөж буй боломжийг ашиглан орд газруудаа хайж илрүүлэх зайлшгүй шаардлагатай байна" гэсэн байр суурийг Аж үйлдвэр, эрдэс баялгийн сайд Г.Дамдинням илэрхийллээ.