Х.Ганхуяг: Өргөн баригдаагүй байгаа төслийг УИХ-аар өнөө маргаашгүй батлуулах гэж байгаа мэтээр буруу ойлголт өгч байгаад хэрсүү хандана гэдэгт итгэлтэй байна

УИХ-ын гишүүн Х.Ганхуяг Татварын багц хуулийн төсөлтэй холбоотойгоор олон нийтийн сүлжээнд гарч буй мэдээлэлд тайлбар өглөө. Тэрбээр “Хувь хүний орлогын албан татвар” ХХОАТ-ын хуулийг 2022 онд өөрчлөн 10,15,20 хувийн шатлалаар татвар авч байсныг иргэд олон нийт маань одоо л мэдэж байна.

2024 оны 12 сард УИХ-аас байгуулагдсан ажлын хэсэг Татварын багц хууль дээр найман сар ажиллаж нийт 4 их наяд төгрөгийн татварын хөнгөлөлт үзүүлэхээр хуулийн төсөл боловсруулсан. Төслөө олон нийтэд хэлэлцүүлэхээр D-Parliament дээр нээлттэй байршуулаад байна.

ХХОАТ, НӨАТ дээр:

800 мянган төгрөгийн цалинтай хүн 13 хувийг татварт өгч байгаа бол 0.8 хувь болно

1.5 сая төгрөгийн цалинтай хүн ХХОАТ, НӨАТ-т 202 мянган төгрөг өгч байгаа бол 2 дахин буурна

3.5 сая төгрөгийн цалинтай хүн 488 мянга буюу 14 хувийг татварт өгч байгаа бол 9.5 хувь болно

Одоогийн хуулиар жилийн 180 сая төгрөгөөс дээш орлоготой хүн 20 хувийн татвар төлж байгаа.

Шинэ төслөөр 360 сая төгрөгөөс давсан орлоготой хүн 20 хувийн татвар төлөхөөр тусгасан.

Одоо мөрдөж байгаа хууль, Нэмэлт өөрчлөлтийн төслийг сайтар харьцуулаад үзэх юм бол шууд 10,15,20 хувийн татвар авч байгааг 10-20 хувь хүртэл 6 шатлал оруулж өгсөн. Шатлал нэмэгдэх тусам иргэд, ААН ээс авах татвар хөнгөлөгдөж ачаалал буурч байгаа юм.

Өргөн баригдаагүй , олон нийтийн саналыг авч байгаа төслийг УИХ-аар өнөө маргаашгүй батлуулах гэж байгаа мэтээр буруу ойлголт өгч байгаад иргэд маань хэрсүү хандана гэдэгт итгэлтэй байна. Мөн төсөлтэй сайтар танилцаад саналаа ч идэвхтэй өгөөрэй" гэв.