ХЗДХ-ийн сайд Л.Мөнхбаатар АНУ-аас Монгол Улсад суугаа Элчин сайд Ричард Буангантай уулзлаа

АНУ-аас Монгол Улсад суугаа Онц бөгөөд Бүрэн Эрхт Элчин сайд Ричард Буангантай Хууль зүй, дотоод хэргийн сайдын хувиар уулзаж, хоёр орны хууль зүйн салбарын хамтын ажиллагаа, цаашид хэрэгжүүлэх төсөл хөтөлбөрүүдийн талаар  санал солилцлоо. 

Хууль зүй, дотоод хэргийн сайдын хувьд “Эрх зүйн шинэтгэл 2.0” хийж Монгол Улсад мөрдөгдөж буй хуулиудын хүний эрхийг хангасан байдлыг үнэлэн, холбогдох хуулиудад өөрчлөлт оруулахаар ажиллаж байна. Мөн “Эдийн засгийг эрх зүйгээр дэмжих” хөтөлбөрийн хүрээнд хөрөнгө оруулагчдыг дэмжих, хамгаалах чиглэлд хуулинд өөрчлөлт оруулахаар ажиллаж байгаа бөгөөд энэ талаараа элчин сайд Ричард Баунгантай ярилцлаа. Цаашид үндэстэн дамнасан зохион байгуулалттай гэмт хэрэг, хар тамхи мансууруулах бодис, сэтгэцэд нөлөөлөх эм бэлдмэлтэй холбоотой эрсдэлийг бууруулах чиглэлд хууль тогтоомжийн хэрэгжилтийг хангах, урьдчилан сэргийлэх, тэмцэх, илрүүлэх чиглэлд АНУ-ын хууль хяналтын байгууллагуудтай хамтын ажиллагаагаа өргөжүүлэх, албан хаагчдын мэргэжлийн ур чадварыг нэмэгдүүлэх, дэвшилтэт техник технологи, тоног төхөөрөмжийн дэмжлэг үзүүлэх хөтөлбөрүүдийг хамтран хэрэгжүүлэх хүсэлтэй байгаагаа илэрхийллээ. 

Элчин сайд Ричард Буанган хоёр улс дипломат харилцаа тогтоосноос хойш бүхий л салбарт харилцаа хамтын ажиллагаа өргөжин, дэвшилт гарч байгаа бөгөөд тэр дундаа Монгол Улсын Засгийн газар, АНУ-ын Төрийн департаментаас хэрэгжүүлж буй Хүүхэд хамгааллын компакт гэрээ,  ЦЕГ, Дотоод хэргийн их  сургуулийн албан хаагчдыг чадавхжуулах тал дээр анхаарч сургалт, хөтөлбөрүүд хэрэгжүүлж байгаагаа онцоллоо. Мөн хар тамхи, мансууруулах бодистой холбоотой гэмт хэрэгт хамтран ажиллах талаар Вашингтонд уламжлах талаараа хэлээд  Хууль зүй, дотоод хэргийн сайдын хувиар Эрх зүйн шинэтгэлийг амжилттай хэрэгжүүлэн хууль ёсыг дээдэлсэн, авлигагүй, нээлттэй эдийн засаг, хууль эрх зүйн орчныг бий болгоно гэдэгт итгэлтэй байгаагаа илэрхийллээ.