ЭМГЭНЭЛ

 ДЭНДЭВИЙН ТҮМЭНДЭМБЭРЭЛ

(1947-2025)

 Монгол Улсын Их Хурлын гишүүн асан, Алтангадаст одон, ахмад инженер, төр, нийгмийн зүтгэлтэн Дэндэвийн Түмэндэмбэрэл 2025 оны 07-р сарын 04-ний өдөр өвчний улмаас таалал төгссөнд гэр бүл, үр хүүхэд, төрөл төрөгсөд, хамтран зүтгэгчдэд нь гүн эмгэнэл илэрхийлье.

 Дэндэвийн Түмэндэмбэрэл нь 1947 онд Завхан аймгийн Алдархаан суманд төрж, 1967 онд Завхан аймгийн 10 жилийн 1-р сургууль, 1968 онд ЗХУ-ын Ленинград хотын Политехникийн сургуулийн хэлний бэлтгэл, 1973 онд Усан тээврийн дээд сургуульд Механик инженер мэргэжил эзэмшин, 1984 онд Улаанбаатар хотын Намын дээд сургуулийг тус тус дүүргэжээ.

 Тэрбээр, ажил амьдралын гараагаа 1973 оноос эхэлж Баянхонгор аймгийн Эрчим хүчний үйлдвэрт инженер, 1977 онд Завхан аймгийн Эрчим хүчний нэгдсэн үйлдвэрийн дарга, 1984 онд Говь-Алтай аймгийн Намын хорооны нарийн бичгийн дарга, 2-р нарийн бичгийн дарга, 1990 онд Баянхонгор аймагт үйлдвэрлэл, үйлчилгээний чиглэлийн хоршоолол, аж ахуй нэгжийг байгуулан ажиллаж, орон нутгийн эрчим хүчний салбарыг сэргээж, станцуудыг хэвийн горимд оруулж, засвар үйлчилгээний ажилд хариуцлагын тогтолцоог нэвтрүүлж чадсан гавьяатай эрхэм юм.

 Мөн 2000 онд Монгол Улсын Их Хурлын гишүүн, 2007 оноос Хаан банкинд байгууллагын харилцаа хариуцсан газрын захирал, Хадгаламж банкны газрын захирал, Гүйцэтгэх захирлын зөвлөхөөр ажиллаж байв. Улсын Их Хурлын гишүүнээр ажиллаж байх хугацаандаа түүний санаачлан, батлуулсан хууль тогтоомжууд нь улс, эх орны өнөөдрийн хөгжил, дэвшилд бодитой үр дүн үзүүлсээр байна.

 Тэрбээр төр, нийгмийн ажлуудад идэвх санаачилгатай оролцож байсны зэрэгцээ “Дэлхийн шинэ журам”, “Өрлөг жанжин хүлэг баатар Боорчи”, “Үр хүүхэддээ үлдээх өв журам”, “Ухаарал тээсэн он жилүүд”, орчуулгын “Хуйлралын эмчилгээ”, “Эрчим хүчний шинэ эх үүсвэрүүд” зэрэг 20 гаруй ном, бүтээл бичиж, олны хүртээл болгожээ.

 Монгол Улсын төр засгаас түүний хөдөлмөр зүтгэлийг төр засгаас өндрөөр үнэлж, 1984 онд Онц хилчин, 6-р таван жилийн гавшгайч, усгаар тогтнолын одон, төрийн дээд шагнал Алтангадас одонгоор тус тус шагнасан юм.

 Дэндэвийн Түмэндэмбэрэл таны Монгол Улсын хөгжил дэвшил, эрчим хүчний салбарт оруулсан үнэтэй хувь нэмэр, нөр их хөдөлмөр, чин шударга, даруу төлөв зан чанар бидний зүрх сэтгэлд мөнхөд дурсагдах болно.

 У.ХҮРЭЛСҮХ, Д.АМАРБАЯСГАЛАН, Г.ЗАНДАНШАТАР,

Ц.САНДАГ-ОЧИР, С.ГАНБААТАР, Б.ЧОЙЖИЛСҮРЭН, Б.ТҮВШИН

Б.САНЖСҮРЭН, Г.ӨНӨРБАЯР, Ж.БЯМБАДОРЖ,

Т.ГАНДИ, Т.ОЧИРХҮҮ,  Д.НАСАНЖАРГАЛ