Х.Нямбаатар: Авлигын хэргээр ял шийтгэл авч байсан нэг хүн намайг АТГ-д шалгуулахаар өгчээ

Нийслэлийн засаг дарга бөгөөд Улаанбаатар хотын захирагч Х.Нямбаатар цахим хуудастаа мэдэгдэл гаргажээ.

Тэрбээр, Авлигын хэргээр ял шийтгэл авч байсан нэг хүн намайг АТГ-д шалгуулахаар өгчээ. Юуг шалгуулах гэж байгааг нь харлаа. Бөөрөлжүүтийн цахилгаан станц нь Монгол улсын Засгийн газрын 201-р тогтоолын дагуу нийслэл хот дотоодын бондоор эргэн төлөгдөх дамжуулан зээл олгож санхүүжүүлэн, 2024.12.26-нд ашиглалтад оруулж төвийн бүсийн нэгдсэн сүлжээнд залгасан цагаас хойш 2025.07.01-ний байдлаар 430 сая квт.цаг эрчим хүч үйлдвэрлэн нийслэл хотод нийлүүлсэн байна.

Нийслэл хот бонд босгож санхүүгийн зарчмаар баталгаа, барьцаа, менежмент зэрэг эрсдэлийг харгалзан тодорхой хэмжээний хувь нэмж Бөөрөлжүүтэд дамжуулан зээлдүүлсэн. Энэхүү бондыг 2027 оны 06.25-нд бүтэн төлж дуусгана. Бондын эргэн төлөлтийн 3 жилийн хугацаанд Нийслэлд 126 тэрбум төгрөгийн хүүгийн орлого төвлөрөх юм.

Намайг хотын дарга болохоос өмнө гэрээ зурагдаж эхлээд, санхүүжилтгүй зогсох эрсдэлтэй байсан төсөлд дамжуулан зээл олгож цахилгааны хязгаарлалтад орох нь тодорхой байсан эрсдэлийг хаасан төсөл бол Бөөрөлжүүт.

Энэ жил дахиад хоёр дахь блок буюу нэмэлт 150мв ашиглалтад оруулахаар ажиллаж байна. Түүний дараа жил 150мв, 2027 оны эцэст 4-р блок ашиглалтад орсноор нийт 600мв-ын цахилгаан станцтай болно. Шаардлагатай гэж үзвэл дахиад ч дамжуулан зээл өгөхөд бэлэн байна. Дахиад шалгуулахад ч бэлэн байна. Сайн шалгаарай хэмээв.