Ж.Энхжаргаланг шүүгчийн захирамжийн дагуу өчигдөр 19.00 цагийн үед суллажээ 

НИТХ-ын төлөөлөгч, Төв цэнгэлдэх хүрээлэнгийн Гүйцэтгэх захирал Ж.Энхжаргалан, АН-ын гишүүн Д.Мөнх-Эрдэнэ нар өнгөрсөн дөрөвдүгээр сарын 28-нд Төв цэнгэлдэх хүрээлэнд маргалдаж, бие рүүгээ салаавч гарган, олон нийтийн газар танхайрсан байдаг. Уг үйлдэлд нь өчигдөр шүүхээс 9 хоног баривчилж, 10 хоног албадан сургалтад хамруулах шийдвэр гарч, тэднийг ШШГЕГ-ын харьяа 409 дүгээр баривчлах ангид аваачжээ.

Харин Хүний эрхийн хороо пэйжид Ж.Энхжаргаланг Баривчлах төвд хоноогүй. Төрийн албан хаагч эрх мэдлээ ашиглалаа гэх утгатай пост тавигдсан. Энэ талаар албаны эх сурвалжаас тодруулахад "Ж.Энхжаргалангийн өмгөөлөгч давж заалдах гомдлоо шүүхэд хүргүүлсэн. Тиймээс шүүхээс давж заалдах гомдлыг үндэслэн баривчлах шийтгэлийг түдгэлзүүлэх шүүгчийн захирамжийн гарсан. Улмаар шүүгчийн захирамжийн дагуу Ж.Энхжаргаланг өчигдөр 19.00 цагийн үед сулласан" гэлээ.