Сэлэнгэ аймгийн Ерөө, Булган аймгийн Сэлэнгэ суманд гарсан ой, хээрийн түймрийг цурманд оруулжээ

ОБЕГ-аас ой хээрийн түймэр болон цаг үеийн асуудлаар мэдээлэл өглөө.

ОБЕГ-ын Гал түймэртэй тэмцэх газрын дарга, хурандаа Ц.Нямбаяр" Он гарснаас хойш 12 аймгийн 59 сум, нийслэлийн гурван дүүрэгт нийт 98 удаагийн ой хээрийн түймэр дуудлага мэдээлэл бүртгэгдсэн. Энэ нь өнгөрсөн оны мөн үетэй харьцуулахад 36.7 хувиар өссөн дүнтэй байна. Дээрх ой, хээрийн гал түймэрт урьдчилсан байдлаар ойн 65,768 га, хээрийн 565,569 га талбай, нийт 631,337 га талбай, 5 байшин, 49 гэр, 5 автомашин, 7 мотоцикл, 125 малын хашаа, 5937 бог, 470 бод мал, 7980 боодол өвс, 80 шуудай тэжээл өртөж, шатжээ. Улмаар 5 тэрбум төгрөгийн хохирол учирсан байна.

Өнөөдрийн байдлаар Сэлэнгэ, Хөвсгөл, Булган, Хэнтий аймагт гарсан түймрийг унтраахаар ажиллаж байна.

Одоогоор Сэлэнгэ аймгийн Ерөө сум “Буурлын даваа” гэдэг энэ сарын 26-нд газар гарсан ойн түймэр, Булган аймгийн Сэлэнгэ сумын “Баруун голын даваа” гэдэг газар 27-нд гарсан ой, хээрийн гал түймрийг цурамд оруулж, бүрэн унтраахаар ажиллаж байна. Мөн бусад таван түймрийг цурамд оруулахаар ажиллаж байна. Онцгой байдлын байгууллагаас сар бүрийн сүүлийн долоо хоногийн пүрэв гарагийг “Аюулгүй байдлаа шалгах” өдөр болгон зарласан.

Энэ өдөр маргааш буюу тавдугаар сарын 28-нд тохиож байна. Тус өдрийн хүрээнд иргэн, өрх, аж ахуйн нэгж, байгууллагад зориулсан “Хяналтын хуудас”-ыг nema.gov.mn сайтад байршуулсан.

Уг хуудсаар дамжуулж иргэн бүр өөрийн болоод ажиллаж байгаа газар, амьдарч байгаа орчныхоо аюулгүй байдлыг үнэлэх боломжтой. Улмаар эрсдэлийг тооцон, гамшгаас хамгаалах мэдлэг, ойлголтоо нэмэгдүүлэхэд 2-3 минутыг зарцуулаарай гэж зөвлөе" гэв.