Хүдэр суманд гарсан ойн түймрийг бүрэн унтраав

Сэлэнгэ аймгийн Хүдэр суманд энэ сарын 09-нд гарсан ойн түймрийг өчигдөр /2025.05.11/ 18:57 цагт бүрэн унтраалаа.

Түймрийг унтраах ажиллагаанд тус аймгийн Онцгой байдлын газрын Хүдэр сум дахь Эрэн хайх, аврах салбар, мөн суманд үйл ажиллагаа явуулдаг “Дарханы Төмөрлөгийн Үйлдвэр” ХХК-ийн “Төмөртэйн” төмрийн хүдрийн уурхайн ажилчид, Тариа бригад, Хүдэр сумын мэргэжлийн ангийн нийт 115 хүн, 13 техник хэрэгсэлтэйгээр ажилласан юм. Урьдчилсан байдлаар тус түймэрт 104 га ойн талбай өртсөн гэж ОБЕГ-аас мэдээлэв.

Мөн Булган аймгийн Баян-Агт сумын Дулаанхаан багийн “Доод-Өл” гэдэг газар /аймгийн төвөөс баруун зүгт 120 км, сумын төвөөс зүүн зүгт 45 км/ ойн гал түймэр гарсан тухай дуудлагыг 05.10-ны өдрийн 13:40 цагт хүлээн авчээ.

Тус аймгийн Онцгой байдлын газрын 20 дугаар ангийн алба хаагчид, сумын мэргэжлийн анги, орон нутгийн ойн гал түймрийг унтраах ажиллагааг зохион байгуулан 05.11-ний өдрийн 11:30 цагт бүрэн унтраасан байна. Урьдчилсан байдлаар ойн гал түймэрт 1.5 га талбай өртжээ.