АРДЧИЛСАН НАМЫН ДАРГА С.ЭРДЭНЭ МЭНДЧИЛГЭЭ ДЭВШҮҮЛЛЭЭ

Өнөөдөр бид Тулгар төрийнхөө 2223, Их Монгол улс байгуулагдсаны 808 жилийн ой, Үндэсний их баяр наадмаа өргөн дэлгэр тэмдэглэж байна. Наадамчин олон та бүхэндээ дэнж хотойж, дэлхий донсолгосон Монгол наадмынхаа уухайг хадаан өргөн дэлгэр наадахын өлзий дэмбэрэлтэй ерөөлийг өргөн дэвшүүлье.

Ардчилсан нам алдаа оноо бүхнээ нийт гишүүд, Монголынхоо ард түмнээр дэнслүүлж, 2017 оны Ерөнхийлөгчийн сонгуульд өндөр амжилттай оролцлоо. Монголчууд та бид Ардчилсан Ерөнхийлөгчийнхөө буухиаг тасалсангүй. Ардчилал хүний эрх, эрх чөлөөний тугаа бөхийлгөсөнгүй. Энэ их итгэл, хүндэтгэлийг дааж, эрхэм зорилгоо биелүүлж чадах бүтээлч Ерөнхийлөгчтэйгөө хамт ирэх он жилүүдийг угтах болсондоо таатай байна.
Түүнчлэн Монголын улс төрд шинэ соёл тарьж, анх удаа бүх гишүүдээсээ даргаа сонгож, нийт 17 мянга гаруй сонгуульт албан тушаалд 20 мянга гаруй хүн өрсөлдөж намынхаа удирдах бүрэлдэхүүнийг бүх гишүүдийнхээ итгэл, сэтгэлийг хүлээсэн хүмүүсээр бүрдүүллээ. Энэ бол Ардчилсан намд төдийгүй Монголын улс төрд томоохон шинэчлэл авчирсан үйл явдал билээ. Цаашид ч энэхүү шинэчлэл үргэлжлэх бөгөөд Монголын улстөрд шинэлэг, Ардчилсан байдлаараа үргэлж манлайлсаар байх болно.
Нийт монголчууддаа хандаж хэлэхэд Монгол Улс хөгжин дэвшиж, хүн ардын нуруу тэнэгэр хотол олноороо өргөн дэлгэр наадах тэр цаг удахгүй билээ. Ардчилсан нам шударга ёс, Ардчилал, хүний эрх, эдийн засгийн хөгжил дэвшлийн төлөө тууштай зогсож, Монгол түмнийхээ итгэлийг сэтгэлээр хариулахын төлөө зүтгэх болно. Монгол түмнийг Мөнх тэнгэр ивээх болтугай. Та бүхэн хотол олноороо өргөн дэлгэр сайхан наадаарай.