​ УИХ-ын дарга Д.Амарбаясгалан БНСУ-ын виз олголтыг хөнгөвчлөхөд анхааран ажиллахыг хүсчээ

БНСУ, манай улс хоорондын хамтын ажиллагаа, харилцаа өргөн хүрээнд хөгжиж байгаа ч манай улсын иргэдэд БНСУ-ын визний асуудал хамгийн хүнд байна. Өөрөөр хэлбэл Солонгосын виз авах гэж урт хугацаагаар гадаад пасспортоо өгч хүлээдэг, виз авсан ч Солонгосын хил дээрээс буцдаг асуудал нэмэгдсээр байгаа юм. Олон нийтийн зүгээс уг асуудлыг шүүмжилсээр ирсэн ч тодорхой үр дүнд хүрэхгүй байна. Харин УИХ-ын дарга Д.Амарбаясгалан өнөөдөр БНСУ-ын Үндэсний Ассамблейн дарга Ү Вон Шигтай албан ёсны уулзалт хийхдээ уг асуудлыг хөнджээ. Тодруулбал, харилцан чөлөөтэй зорчих боломжийг бүрдүүлэх, визний таатай нөхцөл бий болгох талаар ярилцсан байна. БНСУ-ын Үндэсний Ассамблейн даргын зүгээс БНСУ-д эрүүл мэндийн үйлчилгээ авахаар зорчиж буй монгол иргэдэд визний таатай нөхцлийг бүрдүүлэхэд онцгой анхаарал хандуулахаа уулзалтын үеэр хэлжээ. Уг асуудалд анхаарлаа хандуулж, үр дүнгээ өгвөл эхний ээлжинд БНСУ руу эмчилгээнд явах иргэд визний таатай нөхцөлтэй болох боломж бүрдэх юм.