Хархорум хотод цаг уурын радарын станц байгуулахаар Засгийн газрын хуралдаанд танилцуулна

Хангайн бүсийн зөвлөлийн анхдугаар хуралдаан Архангай аймгийн Цэцэрлэг хотын “Ара арена” цогцолборт өнөөдөр болж өндөрлөлөө. Хангайн бүсийг уламжлалт мал аж ахуйн төрөлжсөн, хот байгуулалтын дэд бүсээс гадна аялал жуулчлалын чиглэлээр хөгжүүлэх саналыг Засгийн газраас дэмжихээ илэрхийллээ.

Тус хуралдаанд БОУАӨ-ийн сайд С.Одонтуяа оролцож, гишүүд болон иргэдийн асуултад хариулж, бүсийн хөгжлийг төлөвлөхдөө байгаль орчны асуудлыг орхигдуулж болохгүйг сануулсан юм. Уур амьсгалын өөрчлөлтөөс үүдэлтэй гамшигт үзэгдлийн эрсдэлийг бууруулах эрт сэрэмжлүүлэх тогтолцоог бэхжүүлэх ажлыг одооноос хэрэгжүүлж эхлэх ёстой. Иймд Хархорум хотод цаг уурын радарын станц байгуулах асуудлыг хуралдаанаар дэмжиж, Засгийн газрын хуралдаанд танилцуулж, шийдвэрлэхээр боллоо.

Хархорум хотод цаг уурын радарын станц байгуулснаар Монгол Улсын хүн амын нягтрал өндөртэй хэсэг болох Архангай, Өвөрхангай, Баянхонгор аймгийн ихэнх сумд, Дундговь, Өмнөговь, Төв, Завхан зэрэг аймгийн зарим сумдын нутагт цаг агаарын аюулт үзэгдлээс эрт сэрэмжлүүлэх техникийн боломж бүрдэх юм. Түүнчлэн Байдрагийн усан цахилгаан станцын төслийг эхлүүлэх асуудлыг судалж, шийдвэрлэхийг даалгалаа.