Томоохон хотхонууд дунд цэцэрлэг, сургууль байгуулснаар замын ачаалал буурна

Нийслэл Улаанбаатар хотын тулгамдсан асуудлуудыг шийдвэрлэх зорилго бүхий Ерөнхий сайдын дэргэдэх Шуурхай штабын IX хуралдаан болж байна. Хуралдаанаар Агаарын бохирдлыг бууруулах Үндэсний хорооны ажлын танилцуулга, Ерөнхий боловсролын сургуулийн сурагчдын зорчих хөдөлгөөн, Эрчим хүч дулаан, хангамжийн төслийн явц, Хүннү хотын дэд бүтэц болон нийгмийн барилга байгууламжийн хөрөнгө оруулалтын талаар хэлэлцэж байна.

Агаарын бохирдлыг бууруулах Үндэсний хороо агаарын бохирдлыг бууруулах эрх зүйн орчныг боловсронгуй болгох, 2300 гаруй аж ахуйн нэгжийн түүхий нүүрсний хэрэглээг халах зэрэг арга хэмжээ авч ажиллаж байна.

Засгийн газар 2026 оныг Боловсролын жилээр зарласан. Боловсролын үйлчилгээг чанартай, хүртээмжтэй болгох, ачааллыг бууруулах зэрэг арга хэмжээ нь нэрэмжит жилийн ажлын чухал хэсэг байх болно.

 Томоохон хотхонууд дунд цэцэрлэг, бага сургууль байгуулснаар сургууль, цэцэрлэг төдийгүй хотын замын ачааллыг бууруулахад чухал нөлөөтэй гэж үзэж байна. Улаанбаатар хотын замын түгжрэлийн 54,7 хувьд ЕБС-ын сурагчдын зорчилт нөлөөлж байна. Иймд Боловсролын жилийн зарим зорилтыг Улаанбаатар хотын замын түгжрэлийг бууруулах зорилготой мөн уялдуулж буйг танилцуулж байна.