Д.Амарбаясгалан: Гишүүд танхимдаа бүрэн сууж, асуудалдаа идэвхтэй оролцдог байх шаардлагыг тавина

УИХ-ын даргын санаачлагаар чуулганы хуралдааны ирцийг өдөр бүрээр олон нийтэд нээлттэй мэдээлсээр байгаа. Харин гишүүдийн хувьд ирцээ бүртгүүлчихээд чуулганы танхим орхиж, өөр бусад ажил амжуулдаг асуудлыг цэгцлэхээр УИХ-ын дарга хязгаарлалтууд тавьж эхэллээ. Тэрбээр чуулганаар хэлэлцэх асуудлыг Монгол Улсын Их Хурлын чуулганы хуралдааны дэгийн тухай хуульд заасны дагуу тодорой цаг хугацаанд багтааж хэлэлцдэг болсон гэдгийг онцлоод, УИХ-ын гишүүдээс асуух асуултын тоо, хугацаа тодорхой болсон учраас чуулганыг маш тодорхой цаг хугацаанд товлож хуралдуулдаг болно гэсэн зарчмыг баримталж байгаа. Тухайлбал пүрэв гарагийн чуулганы үдээс өмнөх хуралдаан хэлэлцэх асуудлын хугацаатай холбоотойгоор 10 цагт эхлээд 11 цагт юм уу, 11 цаг 30 минутад, эсвэл 12 цагт өндөрлөх хугацаа тодорхой. Үдээс хойших чуулганы нэгдсэн хуралдаан нь эхлэх, дуусах цаг нь тодорхой байдлаар чуулганы хуралдааныг зарлаж, УИХ-ын даргын дэргэдэх Зөвлөлөөс зохион байгуулдаг болж байгаа. Тухайн асуудлыг богино хугацаанд хэлэлцэж байгаа учраас УИХ-ын гишүүд бүрэн оролцоотой, идэвхтэй байхыг УИХ-ын зүгээс шаардаж ажиллана. Гишүүд асуулт асуух, үг хэлэхтэй холбогдуулан кнопоо дарж, нэрээ бүртгүүлчихээд гараад өөр ажил амжуулаад явдаг байдал өмнө нь нийтлэг байсан.

 Цаашид бид ийм тодорхой цаг хугацаанд хуралдах учраас гишүүд танхимдаа бүрэн сууж, асуудалдаа идэвхтэй оролцдог байх шаардлагыг тавина. Хэрвээ нэрээ өгчихөөд чуулганы танхимд таван минутаас дээш хугацаанд байхгүй, орхин гарсан тохиолдолд өгсөн нэрийг жагсаалтаас шууд хасдаг зарчмаар зохион байгуулна. Өнөөдөр Транс Азийн төмөр замын асуудал хууль тогтоогчдын олонхын дэмжлэг аваагүй учраас төслийг санаачлагчдад буцаагдлаа. Цаашдаа ажилдаа хариуцлагатай хандах үүднээс УИХ-ын гишүүд олон нийтийн шүүмжилдэг шүүмжлэлийн дагуу унасан саналыг босгохын тулд олон удаа горимын санал хураалгаж асуудлыг авч явдаг байдлыг таслан зогсооно. Аль аль талдаа бүгдээрээ хариуцлагатай хандах үүднээс гишүүд энэ асуудалд зарчмын хувьд дэмжиж оролцсон бол асуудал шийдэгдээд явдаг хэлбэр байна хэмээн та бүхэндээ хэлэхийг хүсэж байна. Олон нийт УИХ-аас энэ л асуудлыг хүсэж байгаа. Хэлэлцэж байгаа асуудалд хүн бүр анхааралтай, идэвхтэй, хариуцлагатай оролцож, ард иргэдийн амьдралд нийцсэн шийдвэрийг төр гаргаж өгөөч ээ гэдэг зүйлийг биднээс хүсэж байгаа учраас бидний зарчим амжилттай хэрэгжинэ гэдэгт огт эргэлзэхгүй байна гэсэн юм. Ийнхүү УИХ-ын гишүүд чуулганы танхимыг 5-аас дээш минут орхивол тасалсанд тооцогдох, чуулганы нэгдсэн хуралдааны үеэр өөр хурал, зөвлөгөөнд суувал чөлөө олгохгүй болж байна.