​ Оксфордын их сургуулийн захирал Уильям Хейг УИХ-ын дарга Д.Амарбаясгаланд бараалхаж, боловсрол, судалгааны талаар санал солилцжээ

Англид анх удаа Монгол Улсын Их Хурлын дарга албан ёсоор айлчилж байгаа энэ цаг үед хоёр улсын гадаад харилцааг олон салбар, чиглэлд өргөтгөн хөгжүүлэх тухай яригдаж байна. Хамгийн олзуурхууштай нь Д.Амарбаясгалан даргыг Оксфорд хотноо ажиллах үеэр Оксфордын их сургуулийн захирал Уильям Хейг Монгол Улсын Их Хурлын даргад бараалхаж, боловсролын хамтын ажиллагааны талаар санал солилцжээ. Энэ бол маш том боломж, магадгүй ойрд сонсогдоогүй гэгээтэй мэдээ байж мэдэх юм. Азийн цээжинд оршдог нүүдэлчин түмэн минь орчин үеийн, дэлхийн боловсролтой хөл нийлүүлэх шинэ гарц нээгдэв үү. Британийн Парламентын Нийтийн танхимын дарга Л.Хойлын урилгаар Их Британи, Умард Ирландын Нэгдсэн Хаант Улсад Монгол Улсын Их Хурлын дарга Д.Амарбаясгалангийн айлчлалын үеэрээ монголч эрдэмтэдтэй бас уулзаад амжсан. Дэлхийд алдартай Оксфордын их сургууль 40 гаруй салбар сургуультай.

Дөнгөж сарын өмнө Оксфордын их сургуулийн 160 дахь Ерөнхийлөгчөөр томилогдсон ноён Уильям Хейг нь улсынхаа парламентын гишүүнээр 26 жил ажилласан, Гадаад харилцаа, Хөгжлийн бэрхшээлтэй хүний асуудал эрхэлсэн сайд, Консерватив намын дарга явсан туршлагатай улстөрч. Ялгаварлан гадуурхахын эсрэг хуулийг боловсруулж, НҮБ-ын дүрвэгчдийн асуудал эрхэлсэн тусгай элч Анжелиа Жоли-той хамтран Зэвсэгт мөргөлдөөний үед хүчирхийллээс урьдчилан сэргийлэх кампанит ажлыг санаачлан өрнүүлсэн, Британийн Хаанд албан ёсоор зөвлөгөө өгдөг Приви зөвлөлийн гишүүн нэгэн юм.