ХӨСҮТ: Өмнөговь аймгаас улаанбурхан өвчний гурван тохиолдол нэмж бүртгэгдлээ

ХӨСҮТ-ээс улаанбурхан болон халдварт өвчний талаар мэдээлэл өглөө.

Өчигдөр шөнө улаанбурхан өвчний 4 тохиолдол лабораториор батлагджээ. Тодруулбал Улаанбаатар хотод 1 тохиолдол бүртгэгдсэн бол Өмнөговь аймгаас ирсэн 12 хүүхдийн сорьцоос 3 сорьж баталгаажиж, улаанбурханы нийт 18 тохиолдол бүртгэгдээд байна. Үлдсэн сорьц дээр давтан шинжилгээ хийж байгаа гэв.

Улаанбурханаар вакцин хийлгээгүй хүүхэд, сурагчид өвчилж байгаа тул эцэг эхчүүд болон хүүхдүүдэд өмнө нь улаанбурханаар өвдөж байсан эсэх, вакцин хийлгэсэн эсэхээ тодруулж яаралтай вакцинд хамрагдахыг анхааруулав.

Өнөөдрийн байдлаар нийт 58 улс оронд улаанбурхан өвчний тархалт бүртгэгдэж байгаагаас 10 улс оронд өвчний дэгдэлт өндөр байгаа аж. Эдгээр улсуудаас манай улсын иргэдийн түгээмэл зорчдог Вьетнам, Тайланд улсад улаанбурханы дэгдэлт их байгаа гэв. Тиймээс иргэдийг сонор, сэрэмжтэй байж, улаанбурхан өвчний дэгдэлтээс урьдчилан сэргийлэхийг анхааруулав.

Улаанбурхан өвчний эсрэг вакцины нөхөн дархлаажуулалтыг өрх, дүүргийн эрүүл мэндийн төвд хийж байгаа бол ХӨСҮТ дээр сайн дурын дархлаалжуулалтын кабинет ажиллаж байна.