“Ипотекийн даатгалын журам”-д өөрчлөлт оруулах зайлшгүй шаардлагатай

Ипотекийн зээлтэй иргэдийн дийлэнх нь даатгалын талаар буруу ташаа ойлголттой явдаг. Монгол Улсад өнөөдөр 123 мянган иргэн ипотекийн зээлтэй бөгөөд нийт 6.8 их наяд төгрөгийн өртэй байна. Эдгээр иргэний дийлэнх нь гэнэтийн ослын даатгалд хамрагдсан байдаг ч  үүнийгээ амь насны бүрэн даатгал гэж ташаа ойлгодог. Тэгвэл гэнэтийн ослын даатгалд ослын улмаас амь насаа алдах, гэмтэж бэртэх, хөдөлмөрийн чадвараа алдах эрсдэл хамаардаг. Харин амь насны бүрэн даатгал нь аливаа өвчлөл, ослоос шалтгаалан амь насаа алдах, хөдөлмөрийн чадвараа алдах зэрэг өргөн хүрээний эрсдэлийг хамардаг.

Монгол Улс зүрх судасны  болоод хавдрын өвчлөлөөрөө дэлхийд тэргүүлдэг тул зөвхөн гэнэтийн ослоос гадна өвчлөлийн эрсдэлийг хамарсан даатгалын хамгаалалт нэн чухал нь үүнээс харагдаж байна. Үүний тулд Санхүүгийн Зохицуулах Хорооны 2018 оны 210 дугаар тогтоолоор баталсан 'Ипотекийн даатгалын журам'-д өөрчлөлт оруулах зайлшгүй шаардлага тулгарч байна гэсэн үг юм. Нэг үгээр, зөвхөн гэнэтийн ослын эрсдэлийг даатгалд хамруулдаг уг журмыг өөрчлөх шаардлагатай. Хамгийн гол нь иргэд амь насны бүрэн даатгалд хамрагдсанаар гэр бүлдээ санхүүгийн дарамт учруулахгүй байх давуу талтай юм.