Бельги улс биеэ үнэлэгчдийг тэтгэвэр тэтгэмжид хамруулах хуультай боллоо

Бельги улс биеэ үнэлэгчдэд анх удаа ажиллах эрх олгосон хуулийг баталжээ. Шинэ хуулиар биеэ үнэлэгчид ажиллах гэрээтэй байх, эрүүл мэндийн даатгал, жирэмсний тэтгэмж, тэтгэвэр, өвчний амралт авах зэрэг эрх эдлэх боломжтой болсон байна. Энэ хуулийг 2024 оны тавдугаар сард баталж, 2024 оны 12 дугаар сарын 1-нээс хэрэгжүүлж эхэлсэн байна.

Хуулийн гол зорилго нь биеэ үнэлэгчдийг хүчирхийлэл, дарамт, хүний наймаанаас хамгаалах, тэдэнд хууль ёсны хамгаалалт олгох явдал юм. Биеэ үнэлэгчид бэлгийн харилцаа эсвэл үйлдлийг хийхээс татгалзах эрхтэй бөгөөд үүний төлөө ажлаас нь халахгүй. Мөн ажил олгогчид нь аюулгүй байдлыг хангасан, цэвэр ор, бие засах газар, бэлгийн эрүүл мэндийн хамгаалалтын хэрэгслийг хангах үүрэгтэй гэжээ. Гэхдээ тус хууль нь аливаа нэг байгууллагад харьяалагдаагүй тохиолдолд үйлчлэхгүй юм байна.