Д.Амарбаясгалан: Цахилгаан, дулаан нэмэх асуудлыг намын бүлгүүдийн зөвшилцлөөр эцэслэн шийднэ

УИХ-ын Баасан гаригийн /2024.10.18/ чуулганы нэгдсэн хуралдаан үргэлжилж байна. Хуралдаанаар ирэх оны төсвийн төслийг хэлэлцэж байгаа бөгөөд энэ үеэр УИХ-ын гишүүн С.Ганбаатар цахилгаан, дулааны үнийг нэмэх асуудлыг тодруулж, тэрбээр "Эрчим хүчний өртгийг өсгөх, цахилгааны тарифыг 64 хувиар, дулааны үнийг 28 хувиар өсгөнө гэсэн. Бүх гишүүд энэ асуудалд анхаарлаа хандуулаач. Эрчим хүчний үнийн нэмэлт ААН, ард иргэдийн нуруун дээр том ачаа болно" шүү гэв. 

Үүнд мөн УИХ-ын дарга Д.Амарбаясгалан: Бид аливаа асуудлыг өнөөдрөөр харж ярих нь учир дутагдалтай байна. Бид өнөөдөр яаж шийдвэрлэх юм. Ирээдүйд үнэ өртөг тариф эргэж буурах боломж зах зээлийн зарчмаар яаж үүсэх юм гэдгийг харж, алсын хараатай ярих нь зөв. Зөвхөн өнөөдөр үнэ нэмэгдэх гэж байгаа. Нэмэгдээд бүх юм зогсох гэж байгаа юм шиг ойлголтыг иргэдэд өгч болохгүй. Цахилгаан, дулаан хангамжийн дутагдлыг нөхөх эхний алхам нь энэ. Ирээдүйд дулаан, цахилгаан нөхөгдсөний дараа ямар болохыг бодитой тайлбарлаж ярих нь зүйтэй. Гэхдээ эдгээр асуудал шийдэгдэхдээ парламентын түвшинд, улс төрийн намын бүлгүүд хоорондын зөвшилцлийн үндсэн дээр эцэслэн шийдвэрлэгдэнэ гэдгийг хэлэх зөв байх" гэлээ.