УИХ-ын намрын чуулганыг ирэх сарын 1-нд нээнэ

УИХ-ын 2024 оны намрын ээлжит чуулган аравдугаар сарын 1-нд нээлтээ хийнэ.

Чуулганы нэгдсэн хуралдааны эхэнд ирэх оны төсвийн төслийг хэлэлцэхээр товлоод буй. Тус хуулийн төслийг Ерөнхий сайд Л.Оюун-Эрдэнэ өнгөрсөн сарын 30-нд УИХ-ын дарга Д.Амарбаясгаланд өргөн мэдүүлсэн.

Түүнчлэн намрын чуулганаар УИХ-ын стратеги төлөвлөгөө, УИХ-ын даргын санаачлаад буй Гурван төгөлдөршил, Засгийн газрын 2025 оны төлөвлөгөө зэрэг хуулиудыг хэлэлцэх юм.

УИХ-ын дарга Д.Амарбаясгалан намрын чуулганы нээлтээс өмнө орон нутагт ажиллаж,

парламентын үйл ажиллагаа болон эрх зүйн шинэчлэлийн талаар танилцуулсан.Ингэхдээ иргэдээс санал сэтгэгдэл сонсож, хууль батлах үйл ажиллагааг чиглүүлэхээс гадна Үндсэн хуулийн дагуу бүрдсэн анхны 126 гишүүнтэй парламент хэрхэн ажиллаж, эрх зүйн реформ хийх зорилтоо танилцуулсан билээ.  

Өнгөрсөн хугацаанд хүчин төгөлдөр мөрдөгдөж ирсэн 300 гаруй хуульд дүн шинжилгээ хийхэд хүний эрхийн зөрчилтэй 800 орчим зүйл, заалт байгааг судалжээ. Үүнийг шинэ парламент засна гэдгийг тэрбээр онцолсон.