Боловсролын сайд П.Наранбаярыг огцруулах шаардлага хүргүүлэхээр болжээ

Монголын багш нарын үйлдвэрчний эвлэлийн холбооноос Ерөнхий сайд Л.Оюун-Эрдэнэд "Боловсролын сайд П.Наранбаярт хариуцлага тооцон огцруулах, салбарын багш, ажилтны цалин хөлсийг нэмэгдүүлэх" талаар шаардлага хүргүүлэхээр болсноо мэдэгдлээ.

Энэ талаар маргааш /2024.09.20/ албан ёсоор хэвлэлийн хурал хийх аж. Боловсролын сайд П.Наранбаяр багшийн хомсдол арилгах зорилгоор шинжлэх ухааны чиглэлээр их, дээд сургуульд сурч, 80 хувиас дээш буюу 2.7 голчтой төгссөн хүмүүсийг багш бэлтгэх 45 хоногийн курст суулгах шийдвэр гаргасан нь нийгэмд талцал үүсгээд байгаа билээ. Энэхүү шийдвэрийг багш нар эсэргүүцэж ийнхүү огцруулах асуудлыг хөндөхөөр болжээ. 

Багш нарын зүгээс хомсдол бий болсон нь цалин, ажлын ачаалалтай холбоотой гэж үзэж буй. 

Өнөөдөр багшийн үндсэн цалин 1.4 сая төгрөгөөс эхэлж байна. Үүн дээр нэмэгдэл авч 3.8 сая төгрөг авч байгаа 1000 гаруй багш байна. Улсын дунджаар нь аваад харвал,  ерөнхий боловсролын сургуулийн багш дунджаар 2.4 сая төгрөг, сургуулийн өмнөх боловсролын багш 2.3 сая төгрөгийн цалин авч байна гэж сайд нь мэдээлсэн.